kurdsh.ucoz.com

Main » 2008 » ديسمبر » 1 » ناپاكی.... پەیوەندی هاوڕێیەتی دوو برادەر لە گۆڕدەنێ!

---

2.50.35 PM ناپاكی.... پەیوەندی هاوڕێیەتی دوو برادەر لە گۆڕدەنێ!

هاوڕێیەتی و دۆستایەتی پاك، پەیوەندییەكی ئینسانی و سۆزداری بەرز و پیرۆزە، سەرچاوەی راستەقینەی هاوڕێیەتی بێگەرد و، دروست، رەوشت بەرزی و دڵسۆزی و راستگۆییە، هەر ئەو جۆرە هاوڕێیەتییەشە كە نموونەی باڵایە و بە چاوی رێز و نرخ پێدانەوە چاوی لێدەكرێت و لە رۆژانەی تەنگانەدا رەنگدەداتەوە و رووكارە حەقیقییەكەی وەك رۆژی رووناك بە دەردەكەوێت، لەمجۆرە هاوڕێیەتیەدا، پەیوەندییەكی پڕ لە سۆز و خۆشەویستی راستەقینە دەبینین، كە دوورە لە هەر نیاز و مەبەستێكی تایبەتی یا بەرژەوەند خوازانە، هاوڕێی راستەقینە لە رۆژی تەنگانەدا وەك قەڵا، بە دڵ و بە گیان لەگەڵت رادەوەستێ و لە رۆژانی خۆشەویستی و شادیشدا، ئەوپەڕی دڵخۆشیت بۆ دەردەبڕێ، بە پێچەوانەوە، هاوڕێی ناپاك و بەرژەوەندخواز و تەماحكاری داوێنپیس، جگە لە خەنجەر وەشاندن لە پشتەوە و لە زیان گەیاندن هیچی دیكەی نییە، وەك ئەو نموونەیەی كە لەم بەسەر هاتە راستەقینەیەدا دەیخەنەڕوو سەرەتای دروست بوونی پەیوەندی هاوڕێیەتی زۆرجار رێككەوت، رۆڵی سەرەكی دەبینێ لە یەكترناسینی دوو كەس و پاشان بوون بە هاوڕێ، لە هاوڕێیەتی (كاوە) و (ئاری)ش، رێكەوت رۆڵی خۆی بینی. (كاوە)ساڵانێك بوو لەگەڵ باوكی خەریكی بەڕێوەبردنی دووكانەكەیان بوون، باوكی(كاوە) بەر لەوەی بێتە شار، لە شارۆچكەیەكدا، دوكانی( كارەبایی) هەبوو، كە هەم كەلوپەلی كارەبایی تێدا دەفرۆشت و هەمیش كارەباچیاتی دەكرد، پاش ئەوەی باری دارایی باش دەبێ بە خاو و خێزانەوە روو لە شار دەكات و لە ناو بازاڕ دووكانێكی گەورە بەسەر قفڵانە دەكڕێت... بەمشێوەیە (كاوە) هاریكاری باوكی دەكات و لە كاتی دەرچوونی باوكی ئەو دووكانەكە بەڕێوەدەبات، ئیدی رۆژ بە رۆژ كەلوپەلەكانی ناو دوكان زۆر دەبن و دووكانەكەش بەرتەسكتر دەبێتەوە و بیر لەوە دەكەنەوە یان شوێنێكی گەورەتر بكڕن و ئەو دوكانە بفرۆشن، یانیش یەكێ لە دوكانەكانی تەنیشتیان بكڕنەوە، ئەوە بوو پارەیەكی باش بەیەكێ لە دوكانەكانی تەنیشتیان دەدەن و دەیكڕنەوە و هەردوو دوكان لێكدەدەن، هەڵسوڕاندنی دوو دوكانی وەها گەورە بە تەنیا بە(كاوە) ناكرێت، بۆیە(تەحسین)ی دراوسێیان بەپێی توانا هەوڵی بارسووك كردنی دەدات(كاوە) كە ئێواران لە (پەیمانگا) ش دەیخوێند لەگەڵ باوكی رێكدەكەون كە ئەگەر برادەرێكی باش و دەستپاك و دڵسۆزی دەستكەوێ، وردە وردە لەگەڵ خۆی كاری پێبكات تا هەم بە خوێندنەكەی بگات و كاری هەردوو دوكانیش تۆزێك ئاسانتر بەڕێوەببرێت و هەمیش باری سەرشانی باوكی سووكتر بێت، ئەوەبوو لە پەیمانگا ساڵی یەكەم( كاوە) ئاشنایەتی و دواتر دۆستاییەتی لەگەڵ كوڕێك پەیدا دەكات، كە تا رادەیەك كەمدەرامەت بوو، بە حاڵ دەیتوانی پێداویستییەكانی خوێندن دابینبكات كە( كاوە) باری دارایی ئەو تازە دۆستەی دەزانێ، لە باری ئینسانیەوە هەوڵدەدات یارمەتی بدات، ئەمە دەبێتە سەرەتای دروستبوونی پەیوەندی و دواتریش هاوڕێیەتی نێوان ئەو دوو كەسە، چەند مانگێك بەسەر ئەو پەیوەندییەدا رەتدەبێ و (كاوە) بیر لەوە دەكاتەوەە، كە بە جۆرێك یارمەتی هاوڕێكەی بدات نەبێتە هۆی بەسەر خۆدا شكانەوە و تەریقبوونەوەی، بیر لەوە دەكاتەوە باشە بۆ لە دووكانەكەی كارێكی پێنەدات باشتر نییە؟! لەلایەك چیتر پێویستی بە یارمەتی نابێ و لەلایەكی تریش دەبێتە هاوكاری و بۆ خۆشی دەستی لە ئیش گیر دەبێت، ئیدی بیرۆكەكەی خۆی بە باوكی دەڵێ و ئەویش دەڵێ: كوڕم ئەگەر دەزانی كوڕێكی باشە و ئیشكەر و دەستپاكە، زۆر باشە بیهێنە، لە یەكێكی وەهامان باشتر دەستناكەوێت. كە رێكەوتی هاوڕێیەكەی دەكاتەوە كە ناوی (ئاری) دەبێ و نیاز و مەبەستی خۆی پێدەڵێ(ئاری) زۆر مەمنوون دەبێ و بەڵێنی پێدەدات كە تا ئەوپەڕی دڵسۆز و هاوكارێكی گیانی بێ بۆی. بەیەكەوە كاركردن پەیوندی نێوان ئەم دووانە بەهێزتر دەبێت و وایلێدێت دوای ساڵ و نیوێك زۆربەی كارەكانی دووكانەكە (ئاری) بەڕێوەی ببات، ئیدی(كاوە و ئاری) پێكەوە خوێندنی پەیمانگا تەواو دەكەن و بەردەوام دەبن لە بەیەكەوە كاركردن، (كاوە) ناوە ناوە دەچێتە(دوبەی) و جاری وا هەفتەیەك جاری واش مانگێك یا زیاتری پێدەچێت و ئینجا دەگەڕێتەوە، باوكی( كاوە) ش واز لە كارەباچییەتیەكەی خۆی دێنێ و دوو شاگرد دەگرێت ئەوان كارەكانی رادەپەڕێنن لەم ماوەیەدا( ئاری) بە تەواوەتی شارەزای نهێنی كارەكە دەبێ و حساب و كتابەكان باش فێر دەبێ، (كاوە)ش بە هەموو توانای خۆیەوە یارمەتی دەدات و حەقدەستێكی باشی بۆ دەبڕێنێتەوە، كە بە تەواوەتی پێی ببووژێتەوە كەچی تەماح بەری چاوی دەگرێ و بیر لەوە دەكاتەوە و بڵێ: باشە ئەو ماڵ و دوكانە هەر هی من نین و ناشبنە هی من بۆچی بیر لە دوا رۆژی خۆم نەكەمەوە؟ ئەوە راستە(كاوە) برادەرمە، بەڵام نیوەی قازانجیان بەرەنج و شانی منە و من ئەو دوو دوكانە گەورەیان بۆ بەڕێوە دەبەم و كارەكان راییدەكەم و ئەویش تەنیا پارەكە وەردەگرێت، ئیتر دەستپێدەكات و هەر جارەی بڕە پارەیەكی كەم دەگێڕێتەوە بۆ خۆی، پاشان بڕی زیاتر دەگێڕێتەوە و بۆ خۆی گڵیدەداتەوە، ماوەیەك ئەم كارە دەكات بێ ئەوەی(كاوە) هەست بە هیچ بكات، كاركردنی(ئاری) لەگەڵ (كاوە) سێ ساڵی بەسەر دەچێ و باوكی (كاوە)ش بە نۆرە دڵی كۆچی دوایی دەكات(كاوە) لەبەر خاتری دایكی و برا و خوشكێكی و لەبەر بارودۆخی خۆشی بیر لەوە دەكاتەوە ژنێك بێنێ، چەند مانگێكی پێدەچێ بەرێكەوت ئاشنایەتی لەگەڵ كچێك پەیدا دەكات و پاشان دەیخوازت و دەیگوازێتەوە، ژنەكەی (كاوە) ناوی(بنار)دەبێ رادەی تووندوتۆڵی پەیوەندییەكەی نێوان(ئاری) و مێردەكەی دەزانێ، بۆیە زۆر جاران كە(ئاری) دەچۆوە ماڵیان ئەگەر(كاوە)ش، لە ماڵەوە نەبوایە، بە چاوێكی ئاساییەوە تەماشای هاتنی(ئاری) دەكرد بەڵام لەگەڵ ئەوەشدا(بنار) دواتر هەستی بە حاڵەتێكی سەیر دەكرد و نەیدەزانی بۆچی كە(ئاری) دێتە ماڵیان ئەو باری دەروونی تێكدەچێ، كە دیقەتی(ئاری) دەدا وا بە تیلەی چاو نیگای لەسەر ئەوە، هەست كرد ئەوە، لە خۆڕایی نییە هەست بە شتێكی سەیر دەكات لە بەرامبەر(ئاری) دا، ماوەیەكی پێچوو (ئاری) هەر خەریكی گلدانەوەی بڕە پارەكەی خۆی بوو كە بەمدواییە لەسەری راهاتبوو،(كاوە)ش بۆرە هەستێكی كردبوو كە لە حسابەكاندا جۆرە نادیارییەك هەیە و شتێكی ناڕۆشن هەیە، بەڵام بە تەواوەتی نەیدەزانی چییە، بۆیە دوور بە دوری و ناڕاستەوخۆ چاودێری دەكرد، رۆژێك هاوسەرەكەی(كاوە) باسی تەماشاكردنی بە تیلەی چاوی(ئاری) لە (كاوە) گەیاند، ئەویش زۆر بە سەرسووڕمانەوە بیری لەو جۆرە هەڵوێستانەی (ئاری) دەكردەوە و نەیدەزانی داخۆ ئەو باسە چەندێ راستی تێدایە ، لە كاتێكدا جارێ لە گومان زیاتر هیچی تر نییە. ئاشكرا بوونی نیاز پیسی هاوڕێكەیان لەو سەرو بەندانەدا بوو كە (كاوە) سەفەرێكی یەك مانگی بۆ دەرەوەی وڵاتی هاتە پێش، ئەوەبوو سەفەری كرد و (ئاری)یشی لەوە ئاگاداركردووە كە باشتر چاوی لە دوكانەكە بێت، ماوەیەك بوو(ئاری) نیوەڕۆیان بۆ نانخواردن دەچۆوە ماڵی (كاوە) ئەو وای لە دایكی(كاوە) گەیاندبوو، كە پێی غەدرە خەرجی نانخواردنی بخاتە سەر دوكان، هەر چۆنێك بێت ئەگەر پاروە نانێكیش بێت لە ماڵی ئەوان بیخوات باشترە و (كاوە)ش نەك لەبەر پارە بەڵكو بە حوكمی ئەوەی كە زۆر متمانەی پێهەیە و دەمێك ساڵە هاوڕێ و هاوكاری یەكترن، پێی باش بووە كە لە ماڵی ئەوان نان بخوات، بەم بۆنەیە ماوەی نزیكەی كاتژمێرێك یان زیاتر لە ماڵی(كاوە) دەمایەوە، لەو ماوەیەش كە(كاوە) لەسەفەردا بوو، چوونەوەی كردبووە بەرنامە، چەند جارێك هاوسەری(كاوە) بە تەنیا دەمایەوە، ماڵەوەیان بە هەر ئیشێك بوایە یەك دوو كاتژمێرێك دەچوونە دەرەوە، یەكێ لەم جارانەی كە هاوسەری(كاوە) بە تەنیا لە ماڵ دەبێ، هەندێ توانج و پلاری تێدەگرێ، بەڵام ئەو وەڵامی ناداتەوە،(ئاری) لەو وەڵام نەدانەوە دەگاتە ئەو بڕوایەی كە گوایە هاوسەری( كاوە) ئەو قسانەی پێی خۆشە، بۆیە لە چوونەوە ماڵی دواتر، ترسی زیاتر دەشكێ و زیاتر پێلێدەنێ، ئەمە وا دەكات هاوسەری( كاوە) بە روویدا هەڵیشاخێ و تێروپڕ جنێوبارانی بكات، بە هەر حاڵ یەك دوو رۆژان ماڵەوەیان تەرك دەكات و پاشان دووبارە دەستپێدەكاتەوە، بەڵام بێ ئەوەی جورئەت بكات تەنانەت بە تیلەی چاویش سەیری بكات، هاوسەركەی (كاوە) باسەكە بۆ خەسووی ناگێڕێتەوە نەبادا ببێتە كێشە و دواتر بە خراپ بەسەریدا بشكێتەوە، چاوەڕی دەكات،(كاوە) بێتەوە هەر بە یەكجاری دەریبكات و بە شێنەیی كۆتایی بە كێشە بێنێت، چەند رۆژێكی تری پێدەچێ(ئاری) دەست بە بەزمەكەی دەكاتەوە، هاوسەرەكەی(كاوە) بە تەلەفۆن ورد و درشتی رەوشت و هەڵوێستی(ئاری) هاوڕێی بۆ باسی دەكات و داوای لێدەكات كە بگەڕێتەوە بۆ ئەوەی چارەسەری ئەو كێشەیە بكات، ئیدی لەسەر ئەو مەسەلەیە(كاوە) دەگەڕێتەوەو دەست دەكات بە چاو خشاندنەوە بە حساباتەكانی دوكان و خۆشی وا نیشان دەدات كە مەسەلەی ژنەكەی زانیووە، بەڵام دەنگ ناكات،(ئاری) گەیشتبووە ئەو بڕوایەی كە(كاوە) لە خۆ بێدەنگ كردنەكەی نیشانەی رەزامەندی دەربڕیووە، ئەگەر نا یەكێك ئەگەر پێی خۆش نەبێ چۆن شتی وا قبوڵ دەكات، یەك دوو جاری تریش دەچێتەوە و لە هەردوو جاراندا(كاوە) لە ماڵەوە خۆی لە بۆسە دادەنێ بۆی، دیارە دایكشی لە مەسەلەكە ئاگادار دەكاتەوە، رۆژێك هاوسەری(كاوە) لە مەتبەخ خەریكی خواردن ئامادەكردن دەبێ بۆی، ئەویش لێی دەچێتەوە ژوورەوە دەست بە توانج تێگرتن دەكات و پاشان دەستی بۆ دەبات و ئەویش تۆزێك گوایە بە نازو فیزەوە ناڕەزایی دەردەبڕێ، خۆی دێنێ ودەبات، ئەمە(ئاری) هەندەی دیكە هار دەكات و جورئەت دەكات دەستی لە ملی بكات و هەوڵی ماچ كردنی بدات، لەو دەمە(كاوە) لێی دێتە ژوورەوە و بە خۆی و دارێكی ئەستوورەوە تاوی دەداتێ و وەردەگەڕێتە سەری ماركوژی دەكات، بە هەر حاڵ بووبێ(ئاری) خۆی لە بندەستی دەرباز دەكات و بەسەر و گیلاك شكاوییەوە هەڵدێتە دەرێ و رادەكات، چۆن بۆی دەردەچێ ئاوا ببڕای ببڕ ناگەڕێتەوە و هەرچی هەق و حیسابیشی لای (كاوە) دەبێ هەمووی بە جێدێڵێ و خۆی ون دەكات

1 2 3 4 5 Views: 963 | Added by: kurdsh | Rating: 0.0/0

Total comments: 0