kurdsh.ucoz.com

Main » 2008 » ديسمبر » 1 » كوڕێكی هەرزەكار كچێكی لە كوشتن رزگار كرد

---

2.47.53 PM كوڕێكی هەرزەكار كچێكی لە كوشتن رزگار كرد

ساویلكەیی شتێكە هەندێكجار كێشەی گەورە بۆ مرۆڤ دروست دەكات، جا وا رێكدەكەوێ لە دواجاردا ئاراستەی ژیانی ئەو كەسە بەرەو لایەك ببات كە هەرگیز لە چاوەڕوانی شتی وادا نەبووبێ یا رەنگە چارەنووسێكی خۆشیش بۆ ئەو كەسە دروست بكات، بە هەرحاڵ كەسمان پێشبینی سەد دەر سەدی ئایندەمان پێناكرێت، بەڵام ئەوەی كە مرۆڤ خەفەتی بۆ دەخوات و پێی داخبار دەبێت ئەوەیە كەسانێك ببنە باجدەری هەڵەی كەسانی تر و هیچیش گوناهیان یان دەستیان لەو هەڵەدا نەبووبێ، ئەم رووداوەی لێرەدا باسی دەكەین بەسەرهاتی راستەقینەی كوڕە هەرزەكارێكە كە بەسەر خۆیدا هاتووە و دەمێك بەدەستییەوە گیرۆدەی بووە تا دواجار بە سەفەركردنی بۆ دەرەوەی وڵات بە یەكجاری لە دەست كێشەكە رزگاری بووە. خەون بینین بە خۆشەویستییەوە (فەرهاد) تەمەنی بەرەو(16) ساڵی دەڕۆیشت كە پێینایە قۆناغی پێنجەمی ئامادەیی ، هێشتا سەروسیمایەكی هەرزەكارانەی ناكامڵی هەبوو، وردە وردە خەریكبوو تووكی سمێڵی زیاتر دەبوون و لەسەر چەنا گەشی مووی زیاتر دەردەكەوتن، ئەوان سێ ساڵێك دەبوو هاتبوونە ئەو گەڕەكە، راستییەكەی گەڕەكێكی هێمن و ئارام بوو، باوكی(فەرهاد) دوكانێكی گەورەی بۆیە فرۆشتنی هەبوو، بێجگە لە (فەرهاد) یش چەند كوڕێكی گەورەتری هەبوو كە هەر دوویانی لە وڵاتێكی ئەوروپی گیرسابوونەوە و جار جارەش پارەی چاكیان بۆ ماڵەوە دەناردەوە،(فەرهاد) حەزی دەكرد بچێتە ئەوروپا و ئەو بەهەشتەی ئەوێ ببینێ، بەڵام زیاتر مەیلی بۆ ئەوەبوو كە بتوانێ لەوێ بخوێنێ، ئەوەندە شێت و شەیدای ئەوروپای پێوە دیارنەبوو، هەر بۆ خۆی كوڕێكی هێمن و بە تەعبیری خەڵكیش وەك دەڵێن ساویلكە و دڵساف بوو، هەر لە كۆڵانەكەیان بە دەوری(200) مەترێكەوە ماڵێك هەبوو بە رێكەوت توانیبووی برادەرایەتییەكی سادە لەگەڵ كوڕەكانی ئەو ماڵە پەیدا بكات... بەو ناسینەوە ئاشنایەتی بە كچێكی ئەو ماڵە دەبێ كە ناوی(رێزان)دەبێ(رێزان) دوو ساڵێك یا زیاتر لەو گەورەتر دەبێ كە چی هێشتا هەر لە پۆلی پێنجەم رەتینەدابوو، ئاشنایەتییەكەش هەر هێندە دەبێ كاتێك بە پێش ماڵیاندا رەتدەبێ یا لەگەڵ یەكێ لە براكانی رادەوستێ و خەریكی دوان و قسە دەبێ، چاوی پێدەكەوێ هەر لە دوورەوە نیگای لێدەكات و تێیدەڕوانێ، جار جار وەكو خەونێك تەماشای دەكات، بەڵام بێ ئەوەی هیچ شتێك بەزار بدركێنێ، (رێزان)یش ئەوەندەی خەریكی پەیوەندی بەستن لەگەڵ ئەم كوڕ و ئەو كوڕ دەبێ، ئەوەندە خەریكی خوێندن نابێت، تا دەگاتە پێنجی ئامادەیی چ لەسەرەتایی و چ لە ئامادەیی یەك دوو ساڵان لە پۆلێك دەمێنێتەوە... تەماشا كردنەكانی (فەرهاد) دەخوێنێتەو بەڵام هیچ سەنگێكی بۆ دانانێ، (فەرهاد) هەوڵدەدات بە هەر جۆر و رێگەیەك بێت پەیوەندی خۆی بە برایەكانی(رێزان) پتەوتر بكات، بەڵام ئەوان لەبەر ساویلكایەتی و دڵسافییەكەی چ گرنگییەكی وا پێنادەن. (فەرهاد) بەو سادە و ساكارییەی خۆیەوە، وەك هەر هەرزەكارێك جار جارە بە خەون و خەیاڵی (رێزان)وە لەسەر جێ رادەكشێ و خەو دەیباتەوە، بەڵام خولیاو خەونێكی سادە و ئاسایی، جاری واش هەبوو دەیگووت بریا رۆژێك بمتوانیایە پێمگوتبایە تۆم خۆشدەوێت، ئەوجا با هەر وەڵامێكی دابوومایە، خۆ دڵم ئاوی دەخواردەوە و ئاسوودە دەبووم.... هەر چۆنێك بێت دەمێك بوو ئەو خەون و خەیاڵانە لە مێشكی ئەو هەرزەكارە بێ ئەزموونە دەخولانەوە و بێ ئەوەی لەسەر ئەرزی واقیع هیچ راستییەكی لێ ببیندرێت. لەولاشەوە(رێزان)ی سەر بزێو، وەك كچێكی چاو كراوەی سەركێش ئەوەندەی خەركی هەرزەیی و سەر كێشییەكانی دەبێ ئەوەندە ئاگای لەوانەكانی نابێت، پەیوەندی لەگەڵ كوڕێك دبەستێ و یەكێكی تر دەپچڕێنێ.. رۆژهات و رۆژ رۆیی رێكەوتی كوڕێك دەكات و بەیەكتر ئاشنا دەبن و (رێزان) بە دڵ و بە گیان پەیوەندی لەگەڵ ئەو كوڕە دەبەستێ، پتر لە پێنج شەش مانگان ئەو پەیوەندییەیان درێژە دەكێشێ، لە پەیوەندییەكی سەر پێی و سادە تەشەنە دەكات و دەگاتە ئەوەی ژوان بۆ یەكتر دابنێن، ژوانەكان هەر جارەی لە جێیەك و شوێنێك دەبێت، كچە بێ ئەوەی بە خۆی بزانێ دەكەوێتە ناو پەیوەندییەكی خەست و خۆڵ لەگەڵ ئەو كوڕەدا، عەشقی ئەو كوڕە بە تەواوەتی لەسەری دەدات و خۆی تەسلیمی ئارەزووەكانی دەكات و رۆژ بە رۆژیش پەیوەندییەكەیان پەرە دەستێنێ تا دەگاتە رادەی ئەوەی یەك دووجارێكیش (رێزان) دەرفەت وەربگرێ و كوڕە بهێنێتەوە، ماڵەوەشیان بەتایبەتی ئەو كاتانەی كە تەواوی ئەندامانی خێزانەكەیان بەسەفەر دەردەچوون رۆژێك یان دووان نەدەهاتنەوە، ئەم ژوانە دەبێتە خولیای هەردووكیان بەمشێوەیە چەند جارێك رێكدەكەوێ پێكەوە ژوان بگرن، ژوانەكانیان، لە دانیشتن و تەنیا قسەكردن رەتدەدات، و دەگاتە رادەی یەكتر رامووسین. دواهەمین ژووانی تاڵ (رێزان) و هاوڕێكەی، بە تەواوەتی ترس و شەرمیان لە یەك دەشكێ و زۆر سنووری قەدەغەكرا و دەشكێنن، لە دواهەمین ژوانیاندا دوا پەتی سنووری نێوانیان دەشكێ و هیچی تێدا ناهێڵنەوە و بەتەواوەتی لە ناویەكدا دەتوێنەوە و دوای ئەوەی كارەكەیان تەواو دەبێ، هەردوكیان سەرزەنشتی یەك دەكەن و (رێزان)یش دەست بە گریان دەكات، هەر چەند كوڕە دڵی دەداتەوە، بەڵام بێ سوود دەبێ دواجار لەسەر ئەوە رێكدەكەون كوڕەكە لە ماوەی ئەو مانگەدا بچێتە داخوازی و كوڕەش سەد سوێند و قورئان و بەڵێنی پێدەدات كە مانگێكیش نابات داخوازییەكەی دەكات، (رێزان) بەمە توزێك دادەمركێتەوە و باری سەر شانی سووك دەبێ و كاریگەری رووداوەكەی رۆژی دواتر وەكو جاران(رێزان) چاوەڕێی كوڕە دەكات بیبینێ بۆ ئەوە دووبارە بابەتەكە باس بكەنەوە و دووپاتی هەڵوێستی كوڕەكە لە زاری خۆی ببیستێتەوە، بەڵام كوڕە دیار نەكەوت، رۆژی دواتر هەروەها و سێیەم و چوارەمیش هەروا رۆیشت( رێزان) دڵی داخورپا و تێگەیشت چ هەڵەیەكی گەورەی لە دەست قەوماوە، زانی تازە كار لە كار ترازاوە، ئەو كچە هەفتەیەك زیاتر تلایەوە و مردوو و ژیایەوە، هەر رۆژ و كاتژمێرێكی مردنێك و ژیانەوەیەك بوو. باشترین چارە تووشكردنی فەرهادە (رێزان) لەو ماوەیەدا شەو و رۆژی لێ ببووە یەك ، نە خۆراك و نەخەو و خۆشی نەمابوو، هەر لە فكری ئەوەدابوو چۆن ئەو بەڵایە لە كۆڵ خۆی بكاتەوە و خۆی دەرباز بكات، با گوێ لە (خالید)ی برای (فەرهاد) بگرین و بزانین مەسەلەكە بە كوێ گەیشت،(خالید) دەڵێ: جارێ ئاگامان لە هیچ نەبوو، كە هەر سێ براكەی( رێزان) رۆژێك بەخۆو بە كڵاشینكۆفی سەرشانیانەوە بە ژووركەوتن و چاویان ئاگری لێدەباری(باوكم و فەرهاد) و دایكمان داینشاند و دەرگای ماڵەوەمانیان كڵۆم دا، برا گەورەی رووی دەمی لە باوكم كردوو بە قسەهات و گوتی: مام سەلام گوێت لێبێ تۆ باوكی فەرهادی ئەوەی روویداوە تازە روویداوە فەرهادی كوڕت دەستی بۆ نامووسی ئێمە بردووە و دەستدرێژی كردۆتە سەر خوشكی ئێمە، دەرفەتی قسەكردن و خۆهێنان و بردن و نكۆڵی كردن نییە، تا كار لە كار نەترازاوە و خەڵك بە كارەكەیان نەزانیووە، ئێمە خۆمان بە پیاو زانیووە بۆیە خۆمان هاتووین كێشەكە لە نێوان خۆماندا ببڕێنینەوە كەس پێی نەزانێ و نامووسی خۆمان و خۆتان ستر دەكەین، فەرهادی كوڕت تەنیا و تەنیا دوو رێگەی لە پێشە، سێیەمی بۆ نییە، یا خوشكەكەمان مارە دەكات و دەیگوازێتەوە و لێرەش نامێنێ و یانیش مردنی خۆی مسۆگەر بكات، وەختی فكركردنەوە و قسە لەگەڵ یەكتریش نییە، درەنگی شەو یان بە بەڵێ یان بە نەخێر وەڵاممان بدەنەوە، (خالید) لەسەر قسەكانی بەردەوام دەبێ و دەڵێ: هەموومان چاو ئەبڵەق و واقی و ڕماوماین، من و باوكم و دایكم هەرچی لە ماڵەكەبووین كەوتینە سەروگێلاكی فەرهاد و بیكوتەوە ولێبدە و تێیهەڵدە و جنێوی بكە(فەرهاد)ش هەر دەیگوت وام نەكردووە و ئەو كچەم هەر نەشدیتووە) زیاتر هیچی بەدەمدا نەدەهات و ئێمەی بێ سەبر و تەحەمموولیش گوێمان لێنەگرت و وەكو بەشەر فكر بكەینەوە و بپرسین ئەرێ بابچین بنج و بنەوانی مەسەلەكە و بزانین( فەرهاد)ی قوڕبەسەر و سادە و ساویلكە لە كێ و چۆن توانیوویەتی ئەو كچە زۆر زان و بزێوەی ئەوان هەڵبخەڵەتێنێ، بە هەر حاڵ هەڕەشەكەی ئەوان زۆر كاریگەر بوو بەو یەك دوو كاتژمێرە نەخشەمان دانا و بڕیاریشماندا، بچینە داخوازی و براكانی كە لە دەرەوەی وڵات بوون كاری بۆ بكەن و بتوانن داوەتنامەی بۆ بنێرن و رایكێشن یانیش بە زووترین كات بەرێی قاچاغ خۆی بگەیەنێتە لایان، ئیدی هەواڵمان بۆ ماڵی( رێزان) نارد كە سبەی شەو دێینە داخوازی هەموو شت بە پەلە پەلە و وەك بروسكە دەڕۆیی، ئەو باوكم و یەك دوو مام و خاڵم چوونە خوازبێنێ و هەر ئەو شەویش بە مەلا مارەكران، هەم ئێمە و هەمیش فەرهاد هێدمەگرت ببووین كە لە مارەكردن تەواوبووین، بەسەر زمانی گوتی: كوڕە خۆ ئەوە خەونەكەم بووە راستی قەت باوەڕم نەدەكرد رۆژێك لە رۆژان ئەوە بە چاوی خۆم ببینم، ئەو و ئێمەش بەراستی لەگوێی گا نووستبووین، ئیدی ئەو كوڕە نەی پرسی باشە ئەگەر ئەوە كچەكەی درایە ئەی باشە بۆچی بچێتەوە خاریج. هەر چۆنێك بێت بە ماوەی دوو هەفتە تەدارەكی سەفركردنیان بۆ رێكخرا و بە ماوەی نزیكەی مانگێك گەیشتنە ئەوروپا. لەوێ (رێزان) كەدیتی ئیدی گەیشتۆتە شوێنێكی ئەمین، تۆزێك حەسایەوە و نزیكەی دوو هەفتەیەك كاروباری خۆی لەو وڵاتە رێكخست و شەوێك نامەیەكی دوورودرێژی بۆ كاكە فەرهاد نووسی و بەیانییەكەی زوو، هێشتا رۆژ هەڵنەهاتبوو لێی داو رۆیشت ، هەرچی روویدا بوو و چۆن و چی بوو بە ورد و درشتییەوە لەو نامە چەند لاپەڕەییەی نووسیبوو هەموو شتێكی تێدا روونكردبۆووە و لە كۆتایشدا روونیكردبۆوە، ئەگەر ئەو شتەی لەلای براكانی بە ملی فەرهاد دانەهێنابا ئێستا لە شێرگڵ بوو، دوا دێڕیش ئەوەبوو، فەرهاد راستە مرۆڤێكی ساویلكە بووی، بەڵام سوپاس بۆ خودا ساویلكەییەكەی تۆ گیانی مرۆڤێكی تری لە مردنێكی مسوگەر رزگار كرد و تۆش خەونی گەیشتنت بە من هاتە دی و بنەماڵەی هەردوولاش لە خوێن رشتن دووركەوتنەوە و منیش داوا دەكەم خوا بە گەورەیی خۆی لە گوناهەكانم خۆش بێت و ئەو كەسەش كە هەڵیخەڵەتاندم خودا غەزەبی لێبگرێت، سادەیی تۆش حیكمەتێكی تێدابوو.

1 2 3 4 5 Views: 712 | Added by: kurdsh | Rating: 0.0/0

Total comments: 0