kurdsh.ucoz.com

Main » 2009 » يناير » 5 » ئەو عاشقەی لە شەوێكی بێ دەنگدا بەرنامەی مەرگی بۆ خۆی دانا...

---

3.03.25 PM ئەو عاشقەی لە شەوێكی بێ دەنگدا بەرنامەی مەرگی بۆ خۆی دانا...

ئەو عاشقەی لە شەوێكی بێ دەنگدا بەرنامەی مەرگی بۆ خۆی دانا... گەیشتن بە هیوا و ئاواتەكان ژیان خۆشتر و جوانتر دەكەن، بەتایبەتی ئەو ئومێد و هیوایەی كە بە رۆژ و شەو مرۆڤ هەوڵی بۆ دەدات، دەبێت مرۆڤ لەم دنیایەدا هەتا مردن بە ئومێدەوە بژی پەنا نەباتە بەر خۆكوشتن و خنكاندن و سووتاندن، راستە لەم رۆژگارەدا مرۆڤی خراپ زۆربووە، دەزانین هەندێ لە كوڕان بە هەر شێوەیەك بێت هەوڵدەدەن بۆ فریودانی كچان، بەڵام ناشبێ چاومان تەنیا خراپییەكان ببینێ، ئێمە دەڵێین پێكهێنانی ژیانی هاوسەرێتی لە رێگە یەكترناسین و خۆشەویستییەوە سەركەوتووترە نەوەكو لە رێگەی تەقلیدی، بەداخەوە هەندێ لەگەنجان ئەمە بە هەل دەزانن، بۆ گەیشتن بە هەندێ ئامانجی گڵاو، دەرئەنجامیش زۆر رووداو و كارەساتی دڵتەزێن و جەرگبڕی لێدەكەوێتەوە، هەروەكو چۆن كوڕێكی قوتابی قۆناغی زانكۆ بەناوی خۆشەویستی و ئەشق و ئەوینەوە هەستاوە بە فرێودانی (سۆلاڤی) پاك و بێتاوان، دەرئەنجام خیانەتی لەگەڵدا دەكات و زۆر بەبێ ویژدانی جێ دەهێڵێت و كچێكی دیكە دەهێنێت، ئەمەش دەبێتە فاكتەرێكی سەرەكی بۆ ئەوەی (سۆلاڤ) تەمەن(26)ساڵان بڕیارێكی هەڵەبداو بەخۆخنكاندن كۆتایی بە ژیانی بهێنێت. ئەو رۆژە تەندروستی دایكم باش نەبوو، بۆیە هەر زوو گەیاندمانە نەخۆشخانەی فریاكەوتن، بەڵام هەركە چووینە ژوورەوە قەڵەباڵغییەكی زۆرم بەرچاوكەوت ، گریان و هاواری دایك و خوشكەكانی خەڵكی ئەم ناوەی تاساندبوو، من هەرزوو لە خەڵكەكەم پرسی ئەرێ چی بووە؟ گوتیان تەرمی كچێكیان هێناوە كە خۆی خنكاندووە، بۆیە بەپەلە دایكمم گەیاندە سەر یەكێك لە قەرەوێڵەكان و، كەوتمە پرسیاركردن لەم رووداوە، هەر چەندە خەڵكەكەی ئەوێ كەمێكیان لە رووداوەكە دركاند بەڵام نەگەیشتمە راستییەكەی، بۆیە هەر زوو پێش ئەوەی خزم و كەسی كچەكە ئەم ناوە جێ بهێڵن و تەرمەكەش ببرێت بۆ پزیشكی دادی ناونیشانی ماڵی ئەو كچەم لە كەس و كاری وەرگرت، ئینجا گەڕامەوە لای دایكم هەرچەندە دایكم زۆر لێم توڕە بوو كە ئەویش هەقی خۆی بوو، پێی گوتم: منت بەو وەزعە خراپە جێی هێشتووە و بەدوای پرسیاركردنی خەڵكی كەوتووی!؟ بەهەر حاڵ توانیم دایكم هێور كەمەوە كە ئەمەكاری منە و دەبێت بەدواداچوون لەمجۆرە بابەتانە بكەم، بەڵام مێشكیشم هەر لای ئەو كچە خنكاوەبوو، بۆیە بۆ بەیانی هێشتا تەرمەكە لە دادی پزیشكی نەگەیشتبووەوە ماڵە و من گەیشتمە ماڵی ئەو كچە، بەڵام لەبەر شیوەن و گریان و هاوار نەمتوانی بگەمە راستی رووداوەكە، بۆیە ئەو رۆژ تەنیا وەكو گوێ گربووم لەو ماڵە، قسەكردنم لەگەڵ خانەوادەی ئەم قوربانییە بۆ كاتێكی دیكە دواخست، بەرهەحاڵ دوای حەوت رۆژ لەم بەسەرهاتە بۆ جاری دووەم سەردانی ئەم ماڵەم كردەوە، دیار بوو كەمێك لە جاری پێشوو باشتربوون هەستمكرد توانای وەڵامدانەوە پرسیاركردنیان هەیە، دوای سەرەخۆشی لێكردنم لێیان، خۆم پێی ناساندن و داوام لێكردن باسی ئەم رووداوەم بۆ بكەن، ئەوەی پتر لە هەموو ئەندامانی خانەوادەكە وردەكاری كارەساتەكەی دەزانی (سۆما)ی خوشكی (سۆلاڤ)ی جوانەمەرگ بوو، بەڵام دیاربوو ئەوانیش مەرجیان هەبوو لە قسەكردن، ئەویش كە ناوەكان وەكو خۆیان نەنووسرێنەوە، بۆیە من دڵنیام كردنەوە كەوا لە هەموو رووداوەكان ناوی خوازراو بۆ كەسەكان دانراون، كەم حاڵەت هەیە ناوی تەواوی كەسەكان وەكو خۆیان بنووسرێن، مەگەر تەنیا لەسەر داواكاری كەسەكە خۆی بێت. دیارە(سۆما) نزیكترین كەس بووە كە(سۆلاڤ) هەموو قسەكانی خۆی لای باس بكات، ئەویش بە چاوێكی پڕ فرمێسك بەمجۆرە رووداوەكەی بۆ گێڕاینەوە: سۆلاڤ كچێكی تابڵێی زیرەك بوو ئاستی رۆشنبیری زۆر بەرزبوو، تاكە ئەندام بوو لەنێوخانەوادەكەماندا كە دەستی نووسینی هەبێت و چەندین بابەتی لە رۆژنامەو گۆڤارەكاندا بڵاوكردبووەوە، من هیچ كات چاوەڕوانی ئەمەم لە سۆلاف نەدەكرد كەخۆی بەم دەردەبەرێت، سۆلاڤ لە 15 ساڵییەوە تا تەمەنی گەیشتە 26 ساڵ چەندین داواكاری هاتبوون، بەڵام هەرگیز بیری لە شووكردن نەدەكردەوە، كە ئێمە پێمان دەگوت گاڵتەی بە قسەكانمان دەهات، دایكی زۆر خۆشی دەویست و دەیگوت: چۆن دەبێ من شووبكەم و دایكم جێبهێڵم، ئەوەندە بڕواشی بەخۆشەویستی نێوان كوڕان و كچان نەبوو، چونكە دەیگوت: خۆشەویستی و عەشق لە وڵاتی ئێمە مانای مەرگ دەگەیەنێ، دنیای عەشق و ئەوینی وەكو فەزایەكی بێ ئەنجام، سەیر دەكرد، هەرچەندە زۆر جاریش رووبەڕووی داواكاری كوڕانیش ببووە بەڵام قەبوڵی نەكردبوون، بۆیە هەرگیز بڕوام نەدەكرد تووشی داوی عەشق بێ، سۆما لەگەڵ گێڕانەوەی بەسەر هاتەكە زۆر بە كوڵ دەگریا و دڵۆپ ....دڵۆپ فرمێسك دەكەوتنە سەر كۆشی، سۆما بەردەوامبوو لە قسەكانی و گوتی: سۆلاڤ رۆژێك بۆ كارێ رێگای دەكەوێتە یەكێك لە فەرمانگەكانی سەر بە وەزارەتەكەیان و لەوێ كوڕێك دەناسێ و ئەم تەواوكردنی كارەكە دەخاتە ئەستۆی خۆی، بۆیە كارەكە وا دەخوازێ كە ژمارە مۆبایلەكەی بدات بەم كوڕە بۆ ئەوەی لەتەواوبوونی كارەكەی ئاگاداری بكاتەوە، ئەم كوڕە جگە لەوەی فەرمانبەر بوو لەو فەرمانگەیە قوتابی زانكۆش بوو، پاش تەواوبوونی ئیشەكەی سۆلاڤی خۆشكمە كوڕە چەندین جار SMS بۆ سۆلاڤ رەوانە دەكردو چاك و چۆنی دەكرد بەڵام سۆلاڤ وەڵامی نەدەدایەوە، دوای ئەوە پەیوەندیشی بە سۆلاڤەوە دەكرد لەگەڵ ئەوەشدا سۆلاڤ بەهەندی هەڵنەدەگرت، كوڕە بەردەوام دەیگوت: كوڕێكی باش و بە ئەخلاقم و تۆم چووتە دڵەوەو تا ئێستا پەیوەندی خۆشەویستیم لەگەڵ هیچ كچێك نەكردووەو هەرچەندە كچان داواشیان لێكردووە بەڵام ئەو رەتی كردونەتەوە ئەگەر سۆلاڤ رازی بێت ئامادەیە بێت بۆ داوای، ئەم قسانەو چەندین جۆری دیكە لەم قسە بریقەدارانە، تاوای لە سۆلاڤ كرد پەیوەندی خۆشەویستی لەگەڵ ببەستێ، رۆژانە پەیوەندییان بەیەكەوە دەكردو گەلێ جاریش یەكتریان دەبینی، ئەم كوڕە خۆی وەكو فریشتە نیشان كە ئامادەیە لەپێناو خۆشەویستییەكەیان گیانی خۆی بەخت بكات و تەنانەت گەلێ جاری لە SMS كەیان ئەو شعرەیان بۆ یەكتری رەوانە دەكر( ئێمە گیانێكین لە دوو جەستەدا وەك شیعرو ئاواز لەیەك بەستەدا، زۆری دیكەی لەمجۆرە شیعرانە، ئەم پەیوەندییە لای سۆلاڤ لە خۆشەویستی دەرچوو بوو گەیشتبووە ئاستی عەشق، چونكە ئەوەی من دەزانم گەلێ شەو هەبوو ئەگەر ئەم كوڕە نامە یاخود پەیوەندی بە سۆلاڤەوە نەكردایە ئەو شەو تا بەیانی خەوی لێ نەدەكەوت وەكو شێت هەڵدەستا لە حەوشە دەگەڕا، كە دایكم پێی بگوتایە كچم بۆ ناخەوی دەیگوت: دایە گیان تەندروستیم كەمێك باش نییە، ئەم كوڕەش خۆی وانیشان دەدا كە ئاشق بووەو ئەویش بەهەمان شێوە تاوەكو شەو قسەلەگەڵ سۆلاڤ نەكات ناتوانێ بخەوێ، لە مانگی رەمەزانیش دەبووایە هەموو پاشیوێك سۆلاڤ زەنگی بۆ ئەم كوڕە بكردایە، چونكە دەیگوت سۆلاڤ گیان من پاشیوان هەرچەندە بەئاگاش بم تاوەكو تۆ زەنگم بۆنەكەیت هەڵناستم ئەگەر ماڵەوەش بانگم بكەن هەر لەسەر جێگا دەبم و گوێ لە زەنگی موبایلەكەی تۆ دەگرم ئینجا هەڵدەستم، من زۆر جار گاڵتەم بە سۆلاڤ دەكرد دەمگوت: سۆلاڤ گیان شێت بوویی دەیگوت، ئەی ئەشق مانای چییە مانای شێتییە، سۆلاڤ مرۆڤێكی زۆر سادە بوو هەر بۆیە وای بەسەر هات: سۆلاڤ هیچ شتێكی لەماڵەوە نەدەشاردەوە، هیچ نهێنییەكی نەبوو وەكو ئاوێنەیەكی بێگەرد وابوو، بۆیە بەماڵەوەشی راگەیاند بوو كە كوڕێكی رێكو پێكی بە ئەخلاقی چۆتە دڵیەوە ئەویش ئامادەیە بێت بۆ داوای، ماڵەوەمان پێش ئەوەی ئەم كوڕە ببینن رای خۆیاندا، چونكە سۆلاڤ لەمجۆرە كچانە نەبوو كچێكی رۆشنبیرو ئاقڵ بوو، ماڵەوەمان پێیان گوت: باوەڕ ناكەین تۆ كەسێكی خراپ وەكو هاوسەری ژیانت هەڵبژێری تۆخۆت ئازادی لە هەڵبژاردنی هاوبەشی ژیانت و بڕیارەكە پتر لەدەستی خۆتە، تۆ ڕای ئێمەشت دەوێت و ئێمەش خۆشی تۆ، كە سۆلاڤ ئەم قسەی بەو كوڕەگوتبوو كەوا ماڵەوەمان رازین دیار بوو ئەو گوتبووی ئێستا وەزعی ماددی ئێمە باش نییە هەر كە وەزعەكەمان كەمێك باشتر بوو ئامادەم بێم بۆ داوت، كە هاتەوە ئەمەی بۆمگێڕایەوە من هەڵوەستەیەكم كرد و، ئەو كات داوام لە سۆلاڤ كرد كەوا دەست لەم كوڕە هەڵگرێت، چونكە هەندێ قسەی دیكەی كردبوو نەدەچوونە ئەقڵەوە، بەڵام سۆلاڤ ئەشق لەمێشكی دابوو، بۆیە پێم گوت: ئەم مەسەلەیەی لادووبارەو سێبارە بكەوە ئەویش وایكردبوو، بەڵام بەداخەوە ئەم كوڕە دیار بوو دەیوست لەمەوزوعەكان رابكات هەرجارەی بە جۆری، جارێ گوتبووی با تاقیكردنەوەی سەری ساڵ تەواو بكەم و جارێكی تر گوتبووی دوای جەژن، هەر جارێ بیانوویەك و سۆلاڤی بەم درۆیانە رازی دەكرد، من دووبارە بەسۆلاڤم گوتەوە، بەڵام ئەو قەناعەتی بە قسەكانی من نەهات گوتی لەوانەیە وەزعی ماددی باش نەبێت و شەرم بكات لای من باسی بكات سۆلاڤ ئەوەشی گوت: سۆما گیان هەست دەكەم ئەم كوڕە نهێنییەكی گەورەی لە ناخیدایە لێم دەشارێتەوە، حەزناكەم هەندە پرسیار لێ بكەم و بچمە نێو گرفتە تایبەتییەكانی خانەوادەكەی، لەگەڵ ئەوەشدا سۆلاڤ ئەو كوڕەی لەگیانی خۆی خۆشتر دەویست و ئامادە بوو لە رووی ماددیشەوە هاوكاری بكات، چونكە لە خوا بەزیاد بێت ئێمە وەزعی ماددیمان خراپ نەبوو، بۆیە پێی گوتبوو من ئامادەم لەدانانی ماڵیش هاوكاریت بكەم تەنانەت بە ئەڵقەیەكیش رازیم و ئاڵتوون و زێڕ لای من ئەوە ندە گرنگ نییە سۆلاڤ بەرنامەی بۆ ژیانێكی سەركەوتوو دادەڕژیت بەرنامەی پێكەوە ژیانی هەتا مردن لەگەڵ ئەو كوڕە، بەداخەوە ئەم كوڕە خەریكی دانانی بەرنامە بوو كە چی لەگەڵ كەسێكی دیكە كەگوایە دووساڵ لەمەوبەر مارەیی لەكچێكی دیكەی ناسیاوی خۆیان بڕاوە، هەرچەندە ئێمە پرسیاری ئەو كوڕەمان لای هەندێ ناسیاویان كردبوو بەڵام هیچێك لەوان ئەوەیان بە ئێمە رانەگەیاند كەوا ئەم كوڕە دەستگیراندارە و تەنانەت لەدادگاش مارە بڕاون، رۆژێك پێش زەماوەندی ئەم كوڕە: (سۆما) گوتی: لە بیرمە رۆژی پێنچ شەممە بوو كە دەیكردە رۆژێك پێش سازدانی زەماوەندی ئەم كوڕە، كە (سۆلاڤ) ئەو ئاشقە خاینەی بینییوو ئەلقەی لە دەست بوو زۆر بەكەیف بوو، ئەوكات پێی گوتبوو ئەم ئەڵقەیە چییە لە دەستت؟ ئەویش گوتبووی ئەوە ئەڵقەی هاوڕێیەكە لە نێو ئۆتۆمبێلەكەی من جێی هێشتووە لەبەر ئەوەش لە پەنجەم كردووە تا بزر نەبێت و بۆی بەرمەوە، هەروەها گوتبووی گیانە دڵنیابە لە تۆ زیاتر نابێ هیچ كەس ئەڵقە بكاتە پەنجەم، مەحاڵە بێ تۆ بژیم من ناتوانم ژیان لەگەڵ كەسێكی دیكە جگە لە تۆ بەرمەسەر، تەنانەت ئەو رۆژ پێكەوەش چوو بوون بۆ بازاڕ و هەندێ كەلوپەلی زاوایەتیشی كڕی بوو، تەنانەت رۆژی هەینی بەیانییەكەشی سۆلاڤ پەیوەندی پێوەكرد، كە دەیكرد رۆژی ئاهەنگێڕانی ئەو كوڕە، بەڵام بە سۆلاڤی گوتبوو ئەمڕۆ لە ماڵی برادەرێك دەعوەتم بە قوربان دوایی خۆم پەیوەندیت پێوە دەكەمەوە دیاربوو دوای ئەوە موبایلەكەی داخستبوو، دوای تێپەڕبوونی چەندین كاتژمێرێك بەسەر پەیوەندییەكەی سۆلاڤ هەر پەیوەندی نەكردەوە، كەچی دووبارە سۆلاڤ پەیوەندی پێكردەوە، بەداخەوە موبایلەكەی داخرابوو لە دەقەیەك سۆلاڤ زیاتر لە دەجار پەیوەندی دەكرد كەچی هەر داخرابوو، سۆلاڤ وەكو شێتی لێهات گوتی: دەبێ شتێك رووی نەدابێ، تا ئێوارە سۆلاڤ سەدجار پەیوەندی كرد، كەچی هەر داخرابوو، شەو هەر داخرابوو، ئەو شەو تا بەیانی خەو لە چاوەكانی سۆلاڤ تۆراو كاری بەس گریان بوو بەیانی ئەو فەرمانگەیە كەوتە رێ كە ئەو كوڕەی لێ فەرمانبەربوو گوتی: نەوەكو شتێك روویدابێ، سەیری كرد بوو ژوورەكەی داخراوە، بۆیە لە سكرتێری بەڕێوەبەرەكەیان پرسیاری ئەو كوڕەی كردبوو، ئەویش پێی گوتبوو مۆڵەتی زەواجی وەرگرتووە فەرموو ئەگەر كارێكت هەیە با بۆتی جێبەجێ بكەین، بەڵام سۆلاڤ هەر لەوێ رەنگی زەرد دەبێت و ئاگای لە خۆی نامێنێ و بێ خوا حافیزی لە سكرتیری بەڕێوەبەر بە چاوی پڕ فرمێسك ئەوێ جێ دەهێڵێت و بە حاڵ دەگاتەوە ماڵ، كە گەڕایەوە من زانیم شتێك روویداوە گوتم ها سۆلاڤ گیان خۆ چی رووینەداوە بە گریانەوە گوتی: مۆڵەتی زەواجی وەرگرتووە، سەرەتا من گاڵتەم بەو قسەیە هات گوتم: كچێ دڵت تووندمەكە كێ دەڵێت وایە لەوانەیە بە گاڵتەوە گوتبی تاكو مۆڵەتی بدەنێ، بەڵام دوای چەند رۆژێك بۆمان دەركەوت كە راستە ژنی هێناوە و مۆڵەتی مانگێكی وەرگرتووە، لەو رۆژەوە سۆلاڤ بێ هۆش كەوت تەنانەت قومێك ئاویش لە گەرویدا نەدەچووە خوار، كاری بەس گریان بوون دەیان پرسیار لە مێشكیدا پێویستیان بە وەڵامدانەوە هەبوو، بەڵام كەس نەبوو وەڵامیان بداتەوە ئاخر ئەو كوڕە بۆچی وایكرد بۆ خۆی وانیشاندەدا بۆچی... بۆچی... بۆچی!؟ رۆژ لە دوای رۆژ سۆلاڤ وەزعی خراپتر دەبوو تووشی نەخۆشی دەروونی هات، هەر چەندە بردمانە لای دكتۆری دەروونی چەندین داودەرمانی هێوركەرەوەشی بۆدانا بەڵام سەدمەیەكی زۆر كاریگەر بوو، بەداودەرمانی هەموو دونیا چارەسەر نەدەكرا تەندروستی زۆر خراپ بوو كاتژمێر لە دوای كاتژمێر بەرەو خراپتر دەرچوو هاواری دەكرد و دەگریا فرمێسك لە چاوەكانی ووشك نەدەبوو، تاوەكو لە شەوێكی هێمن و خامۆش و بێ دەنگدا كە هەموو خانەوادەكەشمان لە خەوێكی قووڵدا بووین لە بری بەرنامەدانان بۆ دەستپێكردنەوەی ژیانێكی نوێ بەرنامەی كۆتایی هێنانی بۆ ژیانی خۆی داڕشتبوو ، بەداخەوە بیری تەسك و نامۆ هیچ كات لەگەڵ مانا جوانەكانی ئەشق و خۆشەویستی ناگونجێن و مامەڵەشیان لە تەك ناكرێت، كاتێك دوو مرۆڤ یەكتریان خۆش دەوێت و بڕیار دەدەن ئەشق لە نێوانیادا وەكو هێمایەكی پیرۆز سەیر بكەن دەبێت سەرەتای ئەم پێكەوە گرێدانە چ جیهانێكی جوانی پڕ لە خۆشەویستی دروست بكات، بێگومان بڕواناكەم هیچ پێوەرێك بتوانێ بیپێوێت، بەڵام بەداخەوە ئەگەر یەك لەو ئاشقانە خیانەتی لەگەڵ ئەوەی دی كرد، دەبێ چ كارەساتێك رووبدات، لەمەش زیاتر دەبێ چاوەڕوانی چی بكرێ

1 2 3 4 5 Views: 627 | Added by: kurdsh | Rating: 0.0/0

Total comments: 0