الأحد, 2024-04-28, 10.49.19 PM
Welcome Guest |
|
|
Main » 2008 » أوكتوبر » 21 » كوڕێك كچەكەی رفاندم
4.28.53 PM كوڕێك كچەكەی رفاندم |
خاتوو (شوكریە عوسمان)ی تەمەنی(56)ساڵان خاوەنی دوو كوڕ و سێ كچە، ئەو
جیاوازییەكی زۆر دەبینێ لە نێوان ئەوەی كە كوڕەكانی ژنیان هێناوە لەگەڵ
حاڵەتی مێركردنی كچەكانی(كە نازی كچە گەورەم مێردی كرد لەیەك كاتدا هەستم
بە خۆشی و ناخۆشی دەكرد، خۆشی بۆ ئەویە كە مێردی كردووە و چۆتە رێگەی خۆی،
ناخۆشیش لەبەر ئەوەی ئیتر لێم دوور دەكەوێتەوە و وەك جاران هەموو كات
لەبەر دیدە و چاوانم نابێت) شوكریە باس لەوەش دەكات كە بەڕاستی بۆ ماوەی
مانگێك، لەدوای مێردكردنی كچەكەی بە تەجرەبەیەكی دەروونی ناخۆشدا
تێپەڕبووە وەك خۆی دەڵێت: زۆر رقم لە زاواكەم دەبۆوە وامدەزانی كچەكەی
رفاندووە) هەروەها گوتیشی: بەڵام كە دوو كچەكەی دیكەم مێردیان كرد ئاوا
شڵەژاو و دڵگران نەبووم، قەناعەتم هێنا ئەوە سوونەتی ژیانە و دەبێ قەبووڵی
بكەم).
- بە بڕوای خاتوو(سوعاد مەعروف)یش نابێ حاڵەتەكە وا لێك بدرێتەوە "راستە
كاتێك كچان ماڵ جێدەهێڵن و دەچنە ماڵی خۆیان لە رووی دەروونییەوە شتێكی
ناخۆشە بۆ دایكان، بەڵام خۆشییەكەی لە ناخۆشییەكەی زیاترە" (سوعاد)
بۆچوونی وایە مانەوەی كچ لەماڵ هەرچەند ماوەكەی درێژبێ ئەوا هەر میوانە لە
ماڵ و رۆژێك دەبێ دەچێتە رێگەی خۆی، (سوعاد) كە فەرمانبەرە و (46)ساڵی
تەمەنی تەواو كردووە، دوو كچ و كوڕێكی هەیە، كچە گەورەكەی مێردی كردووە
باس لەوەش دەكات راستە ساتی رۆیشتنی كچ لە ماڵ ساتێكی ناخۆشە، بەڵام
دەرەنجام باشییەكانی ئەو پرۆسەیە زۆرترە لە خراپییەكانی و دەڵێت:
پێموانییە هیچ دایكێك هەبێ ئەو هەستە دەروونییەی بكاتە رێگر لە بەردەم
بەشوونەدانی كچەكەی چونكە ئاواتی هەموو دایكێكە كچەكەی بەجلی بوكێنی ببینێ.
- خاتوو (فادیە نوری) یەك لەو ئافرەتانەیە كە لەم رووەوە بە تەجرەبەیەكی
ناخۆشدا تێپەڕیووە، ئەو دەڵێت: من دایكی كچێك و چوار كوڕم، منداڵەكانم
هێشتا بچووك بوون كاتێك باوكیان چووە بەر دلۆڤانی پەروەردگار، بۆیە من بۆ
ئەوان بوومە دایك و باوك و هەموو شتێك ئەوانیش بۆ من هەموو سەلواو خۆشی
ژیان بوون، (نەوال)ی كچم لەبەر ئەوە تاقانەبوو لە هەمووشیان بچووكتر زۆر
بەناز بەخێوكرابوو هەر ئەمەش وایكردبوو جێگەیەكی تایبەتی هەبێ لە نێو
خێزانەكەماندا، (فایدە) بەردەوام دەبێ و دەڵێ: كە تەمەنی گەیشتە (24)ساڵان
خوازبێنی هات و مێردی كرد، مێردكردنی ئەو زۆر بەخراپی بەسەرمندا شكایەوە،
حاڵەتێكی دەروونی سەیری بۆ دروست كردم چەند رۆژێك بەر لە رۆیشتنی هەر
دەگریام دوای ئەوەی لەماڵێش دەرچوو خراپتر بووم وامدەزانی ئەو كوڕە
كچەكەمی داگیر كردووە، بۆیە دوای گەڕانەوەی لە مانگی هەنگووین پێداگیریم
كرد كە دەبێ سێ شەو لەلای خۆم بمێنێتەوە، فایدە دواجار گوتی: (بەمێردكردنی
نەوال گەوهەرێكی بەنرخم لەدەستدا چونكە ئەو سەلوا و بوخچەی نهێنییەكانم
بوو).
بێگومان ئەو تەجرەبەیە بۆ كچانیش شتێكی تازەیە، چونكە ئەوان پاش زەمەنێكی
دوور و درێژی ژیان لەگەڵ دایك و باوك و خوشك و برا دەچنە نێو ژیانێكی
نوێوە و دەبنە هاوژیانی كەسێكی دیكە.
- (ڤیان دلاوەر) كەمتر لە ساڵێكە ژیانی هاوسەری پێكهێناوە، پێی وایە
(كچانیش هاوشێوەی دایكان سەرەتا هەست بە نیگەرانی و دڵ تووندی دەكەن،
چونكە لەو كەسە خۆشەویستانەیان دوور دەكەونەوە كە ساڵانێكی زۆر لەگەڵیان
ژیاون) ڤیان ئەوە رەتدەكاتەوە ئەو حاڵەتە بە داگیركردن یان رفاندن ناو
ببرێت هەروەها دەڵێت: كە مێردم كرد دایكم چەند رۆژێك بەردەوام فرمێسك
بەچاوانییەوە دەبیندرا تەلەفۆنی دەكرد و دەیگوت: بێ تۆ ناژیم دەبێ لە نزك
ماڵی خۆمان خانوویەك بەكرێ بگرێ تا لە من نزیك بیت.
- (لەنجە محێدین)یش دەڵێت: هەرگیز چاوی پڕ لە فرمێسك و نیگا خەماوییەكەی
دایكم لەبیر ناچێت كاتێك هاوسەرەكەم دەستی گرتم و بە بەرچاوی ئەوەوە لە
ماڵ بردمیە دەرەوە، بەڕاستی ساتێكی ناخۆش بوو وامدەزانی دابڕانی
یەكجارەكییەوە جارێكی دیكە خانەوادەكەم نابینمەوە.
(لەنجە) ئەوەشی نەشاردەوە كە لە شەوی بوكێنیدا هەردەم وێنەی دایكی
لەبەرچاو بووە بۆیە ئەویش ماوەیەكی زۆر گریاوە، هەروەها گوتی: دواجار
هەردوولا كچ و دایك دەبێ بە ئەمری واقیع رازی ببن و خۆیان لە گەڵ واقیع
بگونجێنن.
- لە دوابەشی ئەو بابەتەدا توێژەری كۆمەڵایەتی (تاریق غەنی) رای وابوو
دایك تەنیا لە كاتی مێردكردنی كچەكەیدا هەست ناكات كە شتێكی لێ رفێندراوە
یان داگیر دەكرێ، بەڵكە لە كاتی ژنهێنانی كوڕەكەشیدا ئەو هەستەی لا دروست
دەبێ، (تاریق) ئەو حاڵەتە دەگەڕێنێتەوە بۆ فاكتەری سایكۆلۆژی مرۆڤ
بەتایبەتی دایك كە بە هۆی بەخێوكردن و ئەو بەردەوامییەی كەلەگەڵ
منداڵەكانیدا هەیەتی وا هەست دەكات خۆی لە هەموو كەسێك لەپێشترە بۆ ئەوان،
بۆیە هەر هەنگاو و شتێك لە دەرەوەی ئەو لۆژیكەی پێ هەزم ناكرێت
|
|
Views: 679 |
Added by: kurdsh
| Rating: 0.0/0 |
|
|
|