kurdsh.ucoz.com

Main » 2009 » يوليو » 11 » زۆر جار(شادان) دەیگوت ئەگەر من بۆ تۆ نەبم خۆم دەكوژم

---

6.22.59 PM زۆر جار(شادان) دەیگوت ئەگەر من بۆ تۆ نەبم خۆم دەكوژم

ئاهەنگی بووك گواستنەوەی خزمێكی (فەرهەنگ) بوو، كە( شادان و فەرهەنگ) یەكتریان بینی(فەرهەنگ) هەر بە سروشتی خۆی گەنجێكی بەرچاو و بەردڵ بوو، هەڵوێستی جوان و گفتو لفتیشی هێندەی دیكەی بەرچاوی دەخست، دەمێك بوو( فەرهەنگ) لە ناو شاییدا بوو، كە(شادان) بەردەوام چاوی لەسەر بوو، چیتر خۆی بۆ نەگیراو لەگەڵ یەكێك لە خزمەكانی(فەرهەنگ) كە دیاربوو پێشتر دەیانناسی، چوونە ناو شایی و (شادان) رێك و راست چووە دەستی (فەرهەنگ) ئەم لێك نزیكبوونەوەیە بووە رێ خۆشكەر كە(شادان) دەرفەت وەربگرێت و خۆی پێبناسێنێ، لەمەوە جۆرە شەیدایی و ئیعجابێك لە نێوانیاندا دروستبوو، پاشان پتر قسەیانكرد و ژمارەی تەلەفۆنی یەكتریان گۆڕیەوە، هەر چەندە كە (فەرهەنگ) سەیری گەردن و دەست و بازن وخڵخاڵی(شادان) ی، دەكرد، جۆرە هەڵوێستەیەكی دەكرد و لەبەهێزكردنی پەیوەندییەكە هەستی بە ساردبوونەوەیەك دەكرد و شتێك لە ناخەوە پاڵی پێوەدەنا ئەوەندە لەو كچە لە زێڕ و خشڵ وەردراوە نەچێتە پێش، بەڵام هەر كە ئەو بیری لەوە دەكردەوە وەك بڵێی لەو داوە رابكات، كە چاوەڕوانی پێوەبوونی دەكرد، كەچی نیگا و خەندە و هەڵوێستەكانی(شادان) كێشی دەكردەوە كابرا لەیەكەم ساتەوە كەوتە ناو بەرداشی بەراوردكردن لە نێوان خۆی و ئەو كچە لەلایەك كچ، جوان و دیاربوو، سەرتاپای لە زێر هەڵێندرابوو، كچەش دیاربوو لە دڵی خۆیدا بڕیاری خۆی دابوو كە دەبێ ئەو كوڕە بۆ ئەو بێت، لەلایەكی دیكەشەوە، باری دارایی خۆی دەهاتە بەرچاو، كە پێدەچێت لە نێوان خۆی و ئەو كچە جیاوازییەكە تا رادەیەك زۆربێت، بەهەرحاڵ ئەو بەراوردكردنانە هیچ سوودی نەبوو قەدەر ئیشی خۆی كرد، پەیوەندی نێوان(شادان و فەرهەنگ) گەیشتە ئاستێك ، زۆر جار(شادان) دەیگوت ئەگەر من بۆ تۆ نەبم خۆم دەكوژم، بەڵام هەر لەسەرەتای پەیوەندییەكەیانەوە جۆرێك لە گرفت و جیاوازییان دەركەوت، خێزانی(شادان) دەوڵەمەند و سامانداربوون، زۆر جاریش بەو دەوڵەمەندییەیان دەنازی و (شادان)یش بەشێوەیەك لە شێوەكان ئەو بەخۆنازین و خۆ بادانەی پێوە دیاربوو، باری دارایی ماڵی (فەرهەنگ)یش مامناوەندی بوو، جار جار لە كاتی قسەكردنیاندا ئەو جۆرە جیاوازییە دەبوو نیچمە گرفتێك بەتایبەتی كە(شادان) كاریگەری ماڵەوەیان زۆر بەسەرەوە زاڵ بوو(فەرهەنگ) دوای بیركردنەوەیەكی زۆر و پاش ئەوەی پەیوەندییەكەیان گەیشتبووە ئاستی خۆشەویستی، بڕیاریدا لێی دووركەوێتەوە و وازی لێبێنێ ، چونكە گەیشتبووە ئەو بڕوایەی كە ئەوان دوو خێزانی لێكجیاوازن ئەوان زۆر بە دەوڵەمەندی خۆیان دەنازن.. ئیتر هەوڵیدا بە قسە لە (شادان) بگەیەنێ كە واز لە یەكتر بێنن، بەڵام هەر لەگەڵ كردنەوەی باسی واز لە یەكتر هێنان(شادان) خەریك بوو دونیای لێ وێك بێتەوە، دواجار بەڕاشكاوی بە(فەرهەنگ) ی گوت: ئەگەر دەست لەو بیرۆكەیە هەڵنەگرێ ئەوە بە دڵنیاییەوە خۆی دەسووتێنێ و بە مل ئەویشی دادێنێ، (فەرهەنگ) كە زانی بیرۆكەی واز لە یەكتر هێنان بێ سوودە ، ملی بۆ چارەنووس و قەدەر كە چ كرد، هەرچی جیاوازییەكیان لەسەر ماڵ و خەرجی ژنهێنان و زەماوەند و خشڵ و زێر كڕین هەبوو(شادان) بە رێكەوتن لەگەڵ دایكی بەوە چارەسەریان كرد كە (فەرهەنگ) ئەگەر هاتە خوازبێنی ئەوەندەی پێدەكڕێ بیكات ئەویتر ئەوان بۆ خۆیان دەیكەن و ناشیكەن بە منەت بەسەرییەوە، ماڵی (فەرهەنگ) ئەگەرچی زۆریان پێخوش بوو( فەرهەنگ) شادان بخوازێت، بەڵام ترسی ئەوەشیان هەبوو بەیانی(شادان) بەسەریانەوە بنازێت ولاف و گەزافی دەوڵەمەندییان بەسەرەوە لێبدات، بەڵام هیچ لەگەڵ چارەنووس چ ناكرێت، ملیان بۆ چارەنووسی دوو خۆشەویست، كە باری دارایی بنەماڵەكەیان جیاواز بوو، كەچكرد. پەڵپ و بیانووەكانی بووكی تازە ماڵی(فەرهەنگ) خانوویەكی گەورەیان هەبوو ، ئەگەر چی خانووەكە میراتی باپیریان بوون بەڵام لە دەردی كرێچێتی و گۆزە گۆزی ماڵ گواستنەوە و ئەو شتانەیان رزگاركرد بوو، بەڵام بەڕاستیش هی ئەوەبوو چوار پێنچ سەر خێزان بە ئاسوودەیی تێیدا بژین، بۆیە(فەرهەنگ) هەر لەسەرەتاوە مەسەلەی مانەوەی لەگەڵ ماڵی باوكی لەگەڵ(شادان) بڕاندبۆوە ئەویش بەمە رازی ببوو، دوای گواستنەوەی (شادان) بە مانگێك (شادان) دەستی كرد بە پەڵپ و بیانوو گرتن، هەر رۆژەی بە بیانووی شتێك و هەر جارەی بەناوێك، هەرایەكی دەنایەوە (فەرهەنگ)ی تووشی شەرمەزاری كرد، كەسوكاری (فەرهەنگ) لەبەرخاتری ئەو (شادان)یان خۆشدەویست و بەهەموو شێوەیەك دڵیان رادەگرت، بەڵام ئەو مۆتەكەی بەخۆوە نازین و بەخشڵ و زێڕ و پارە و سامانی ماڵی بابیەوە نازن، بەرچاوی لێك كردبوو، زۆر جار دەیگوت: ئەگەر بەناچاری نەبێت قەت لەگەڵ ماڵی بابت دانانیشم ، من هی ئەوەم لەگەڵ ماڵە خەسووان دانیشم. زۆربەی ئێواران براكانی(فەرهەنگ) دەچوونە لای(فەرهەنگ) یەك دوو كاتژمێر لەگەڵ براكەیان كاتیان بەسەر دەبرد، هەر چەندە(شادان)روویانی نەدایێ و بەلالووتی بە بەردەمیاندا هاتووچۆی دەكرد و بە ناچاری مەگەر چایەك یان شەربەتێكی لە پێش دانابان، دەنا ئەوەندە روویان نەدەدانێ، زۆر جاریش(سەرهەنگ) برا بچووكەكەی(فەرهەنگ) شەو لەلایان دەمایەوە و دەخەوت (شادان)لەوە شێتگیر دەبوو، زۆری پێناخۆش بوو، بەڵام لەبەر (فەرهەنگ) هیچی پێنەدەكرا، زۆر جار لەگەڵ (فەرهەنگ) باسی ماڵكردن و كڕینی خانوویەكی سەربەخۆی دەكرد، كەچی(فەرهەنگ) قسەكانی پێشتری خۆی بە بیر دەهێنایەوە، كە چۆن دەیگوت ئەگەر لە ژێر رەشمالێكیش بین، مادام لەگەڵ تۆم رازیم،(شادان) بیری لەوە كردەوە فشارەكانی راستەقینە تر و كاریگەرتربن، چونكە بەو هەوڵانەی هیچ بە هیچ ناكات. بوختان كردن بە شووبرا (سەرهەنگ) كە دیتی براژنەكەی پێیناخۆشە هەندێ شەوان لەلای ئەوان دەمێنێتەوە، بە دایكی خۆی گوت ئەویش گوتی: كوڕم مادام پێی ناخۆشە چیتر شەوان لەوێ مەخەوە، ئەوە ماڵی خۆمان هەیە و لە خوا بە زیادبێ جێگا و رێگاشمان زۆرە، با ئەو ژنە، هێندەی دیكە براكەت وەڕس و بێزار نەكات و چیتر پەڵپ و بیانووشمان پێنەگرێ، ئەویش بڕیاریدا چیتر شەوان نەچێتە ماڵی (فەرهەنگ) ی برای، بەڵام دوو سێ رۆژی پێچوو( فەرهەنگ) بەخۆی بانگی كرد و شەو بە زۆر هێشتییەوە، ئەو شەوە(شادان) بە دزی هەستا و پارچە زێڕێكی خۆی هاوێشتە ناو گیرفانێكی كراسی(سەرهەنگ) و بەیانیش پێش ئەوان لە خەو هەڵساوكردیە هەرا هەموویانی بە دەنگە دەنگی خۆی لە خەو بە ئاگاهێنا، (فەرهەنگ) لێی پرسی چی بووە؟ ئەویش گوتی: ملوانكە لیرەییەكەم نەماوە، دیارە لە(سەرهەنگ) زیاتر كەسی تر لەلامان نەبووە(فەرهەنگ) بەو قسەیە زۆر قەڵس و توڕە بوو، پێی گوت: جارێكی تر قسەی وا نەكەی چونكە(سەرهەنگ) بژی كوژی شتی وا ناكات، ئەویش گوتی: مادام وەها دڵنیای لێی دەمن لە دوێنێ شەوێوە بینیوومە لە دەوری كۆمەدیەكەم دەخولایەوە، باشە بۆچی سەیرێكی گیرفانی جلوبەرگی ناكەی، (فەرهەنگ) لە رقان چووە لای كراسە بە دیوارە كراوەكەی (سەرهەنگ) و گیرفانەكانی پشكنی و دیتی ملوانكەكەی لە ناو گیرفانێكی كراسەكەیەتی، كە زێڕەكەی لە گیرفانی لێ دەرهێنا تەماشایەكی(سەرهەنگ)ی سكرد و بە چاو پرسیاری بوونی ئەو زێڕانەی لە ناو گیرفانی كرد(سەرهەنگ) هەر بە چاو وەڵامی دایەوە كە شتی وای نەكردووە و دەستكاری زێڕی براژنەكەی نەكردووە، لە داخان و لە حەژمەتان تەنانەت توانای وەڵامدانەوەی بە قسەش نەبوو(فەرهەنگ) سەیرێكی(شادان)ی كرد و پێی گوت: بۆ وا دەكەی بۆ بەو رادەیە ژیان لە من و ماڵی دایكم تاڵ دەكەی؟ چیت دەوێ، ماڵی بەجیا، خانووی سەربەخۆ بەناوت بێ، ئۆتۆمبێلی دوا مۆدیل و زێڕ و خڵخاڵ و نازانم چی و چی ؟ (شادان) قیژاندی و هاواری كرد و گوتی: ئەو شتانەم ناوێ چونكە پێشتر هەموو ئەو شتانەم لە ماڵی بابم هەبوو، بەڵام لە هەموو ئەو شتانەش خۆش بووم، كێشەم ئەوانە نییە، كێشەی من ئەوەیە چیتر لە ماڵێك دانانیشم دزی تیادابێت دەستی دایە جانتاكەی و لێی دا و رۆیشت، لەبەر دەرگاكە پێش ئەوەی بچێتە دەرەوە بە(فەرهەنگ)ی گوت: تا لە ژیانمدا ماوم پێم نانێمەوە بەم ماڵە، یان ماڵی سەربەخۆ یانیش من و تۆ نابینەوە ژن و مێرد... شەو (فەرهەنگ) لەگەڵ دایكی و براكانی خەریكی گفتوگۆی ئەو كێشەیە بوون، بەیانییەكەی پێ راگەیاندنێك لە بنكەی پۆلیسەوە بۆ ماڵەوە هات گوایە برایەكی مێردی دزی لێكردووە ئەویش كە پێی راگەیاندنەكەی دیت كە سكاڵای لە دژی براكەی تۆماركراوە، گەیشتە ئەو بڕوایەی ئەو دووانە مەحاڵە بتوانن لەگەڵ یەك بژین(فەرهەنگ) بەخۆو بە (سەرهەنگ)ی برای چوونە بنكەی پۆلیس و پارچە زێڕەكەشیان لەگەڵ خۆیان برد، دوای هەندێ پرسیار و وەڵام ئەفسەرەكە زانی كە سكاڵایەكی بێ بنەمایە، كۆتایی بە كێشەكە هێناو سكاڵاكەشی رەتكردەوە... هەفتەیەك بەسەر كێشەكەدا رەتبوو(شادان) هەستی كرد چ هەڵەیەكی كوشندەی كردووە، هەواڵی بۆ(فەرهەنگ) نارد كە بگەڕێتەوە ماڵەوە و لە هەڵەكەی پەشیمانە، بەڵام(فەرهەنگ) گەیشتبووە ئەو بڕوایەی چیتر ناتوانێ دەستبەرداری بەخۆنازین و بە ماڵ نازینی خۆیانەوە بن، هەمیشە وا هەست دەكەن بنەماڵەی (فەرهەنگ) لە ئاست ئەوان نین، ناكرێ ئەو ژیانێك بژیت كە هەمیشە ئەو جۆرە ناكۆكیانەی تێدابێت و خاوەنی ژنێك بێت بە ماڵ و سامانی ماڵی باوكی بنازێ... یان ژنێك كە وەكو دوژمن سەیری دایك و خوشك و براكانی مێردی بكات و هەوڵیشبدات مێردی خۆشی بكاتە ئەڵقە لە پەنجەی خۆی بكات... شەوان(فەرهەنگ) كە لەسەر جێگا رادەكشا بیری لە قسەكانی(شادان) دەكردەوە كە بەر لەوەی مارەی بكات و بیگوازێتەوە، كە چۆن ئامادەیی خۆی دەردەبڕی لە ژێر هەر بنمیچێك و هەر بارودۆخێكدا بێت لەگەڵ(فەرهەنگ) ئامادەیە خۆشترین ژیان بباتە سەر كە چی دوای زەماوەند چۆن خۆی گۆڕی و خۆی كردبووە مۆتەكە بەسەر سینگی كەسوكاری ئەو، چۆن بەخۆوە نازینی وردە وردە دەردەخست و هەمیشە خۆی و خێزانەكەی بە خانەوادەی نەجیب زادە و دیار وەسف دەكرد، هەموو ئەو ناكۆكی و ئەو جۆرە بیركردنەوانەی(شادان) وایلێكرد بیر لە تەڵاقدانی بكاتەوە ، دوای بیركردنەوەیەكی زۆر ئاخیرییەكەی چووە دادگا و لە پێش دادگا(شادانی) تەڵاقدا.

1 2 3 4 5 Views: 639 | Added by: kurdsh | Rating: 0.0/0

Total comments: 0