kurdsh.ucoz.com

Main » 2009 » أبريل » 8 » پاش مردنی براكەی چ هەڵوێستێكی بەرامبەر براژنەكەی نواند؟

---

2.46.11 PM پاش مردنی براكەی چ هەڵوێستێكی بەرامبەر براژنەكەی نواند؟

تەماح)كردن لە سەروەت و سامان و لە شتەكانی تری دنیا، غەریزەیەكی بەهێز و هەندێكجار لای هەندێ لە مرۆڤەكان، زۆر پیسیشە هەن بۆ بەدەستهێنانی بڕێ سامان، یان دەستكەوتێكی مادی سڵ ناكەنەوە لە تاوانكردنیش، هەشن ئەگەرچی راستەوخۆ لەوانەیە نەتوانن یان جورئەتی كردنی تاوانیان نەبێت، بەڵام رەفتاری دیكە دەكەن كە لەگەڵ تاوانكردن جیاوازییەكی ئەوتۆی نییە ئەم رووداوەش بەسەرهاتی كەسێكە كە لە پێناو بەدیهێنانی تەماحەكانی ئامادەبووە هەر تاوانێك بكات بەتایبەتی كە زۆری هەوڵداوە تا دوای براكەی، براژنەكەی بخوازێت، بەڵام ئایا تەنیا هەر ئەوەندە بووە نیازەكانی؟ ئاهەنگ و زەماوەندە (رێدار و شەهلا) دەمێك بوو دڵیان چووبووە یەك، (رێدار) تازە پێی نابووە بیست و پێنج ساڵی تەمەنی خۆی كە (شەهلا)ی ناسی، بەتایبەتی كە هەردووكیان دەرچووی یەك كۆلێژ بوون و لەیەك دواناوەندیش دامەزران (شەهلا) لە خێزانێكی دەوڵەمەند بوو، ناوناوبانگێكی باش و كەسێكی گران و بەڕێزبوو، ئەو لەڕووی داراییەوە هیچ پێویستییەكی بە مووچەی وەزیفە نەبوو، بەڵام پێی خۆش بوو لەڕێی بڕوانامەكەیەوە خزمەتێك بكات، ئەو تاقانەی دایك وباوكی بوو، ئەگەرچی باوكی بە نەخۆشی دڵ كۆچی دوایی كردبوو، تەنیا دایكی مابۆوە، بەڵام دایكیشی نەخۆشی دڵی هەبوو، چونكە دایك وباوكی ئامۆزای یەكتربوون و نەخۆشییەكەشیان نەخۆشییەكی بۆ ماوەیی بوو، بۆیە دایكی زۆر ترسی ئەوەی هەبوو پێش ئەوەی كچەكەی شوو بكات، ئەو كۆچی دوایی بكات، لەبەر ئەوە بە هیوای ئەوە بوو كچەكەی شوو بكات. (شەهلا)ش رازی ببوو لەسەر داخوازی دایكی بەڵام بەو مەرجەی یان لەگەڵ دایكی دابنیشێت یانیش ئەو كەسەی كە مێردی پێدەكات خانوویەكی زۆر نزیك لە خانووەكەی دایكی بۆ بكڕێت بۆ ئەوەی وەك هەمیشە ئاگای لێبێت و خزمەتی بكات. ئینجا وردەوردە (شەهلا) و(رێدار) لەیەك نزیك دەبوونەوە و پەیوەندییان رۆژبەرۆژ بەهێزتر دەبوو، وای لێهات ئەم دووانە زۆر هۆگری یەك بوون و بەبێ یەك هەڵیان نەدەكرد، تا هەردووكیان هەستیان كرد هەمان هەست وسۆز هەردووكیان بەیەكەوە كۆدەكاتەوە بەڕاستی یەكتریان خۆش دەوێت...(رێدار) كەسێكی سادە و راستگۆ بوو، دڵكراوە و دڵساف بوو، كەسێك بوو چاوی لەسەروەت و سامان و ئەوشتانە نەبوو، بەقەد ئەوەی خۆشەویستی(شەهلا)ی لای مەبەست بوو، رۆژێك (رێدار)بە(شەهلا)دەڵێ كە نیوەڕۆیەكەی لەماڵی ئەوان نان بخوات ئەویش دوای ئەوەی دایكی ئاگادار دەكاتەوە، داواكەی(رێدار) قبوڵ دەكات، نیوەڕۆ دایكی (رێدار) زۆر بەدڵخۆشییەوە پێشوازییەكی گەرم لە (شەهلا) دەكات و بەخۆشحاڵییەكی زۆرەوە هەڵسوكەوتی لەگەڵ دەكات، هەر ئەو رۆژە (رێبوار)یش لەماڵەوە دەبێت كە چاوی بە(شەهلا) دەكەوێ، یەكسەر تەماحێكی پیس بەری چاوی دەگرێ، پاش ئەوەی (شەهلا)باسی خۆی و دایكی و باری دارایی خۆیان دەكات كە پشت بەخۆیان دەبەستن و لە هیچیان كەم نییەو خۆشی تاقانەی دایكیەتی، (رێبوار) سەرەتا هەوڵدەدا تۆزێك بەخراپە باسی(رێدار)ی برای بكات بۆ (شەهلا) بەڵكو لەو رێگەیەوە (شەهلا) دڵی لە (رێدار) ساردبێتەوە، بۆ ئەمە هەوڵدەدا بە رەزیل و چاوچنۆك و تەماحكار لەلای (شەهلا) بیناسێنێ... بەهەر جۆرێك بێت لەو بۆنانەی كە(رێبوار) رێكەوتی (شەهلا) دەكات هەوڵدەدا ئەو جۆرە هەستە لای (شەهلا) بوروژێنێ، ماوەیەك هەوڵی لەو شێوەیە دەدات بەڵام دەرەنجامەكەی هیچ نابێت، پاشان هەوڵدەدا واتێیبگەیەنێ كە چاوی لەماڵ و سامانیەتی، خۆی كەسێكی ماددی و پولەكییە، لەوەشدا سەركەوتن بەدەست ناهێنێ، هەوڵی دیكەش دەدات بەڵام لە هەموویاندا تۆزقاڵێك ناتوانێ هەستی (شەهلا) ببزوێنێ یان گومان بخاتە دڵییەوە، هەموو ئەوانەشی بە جۆرێك دەكرد كە نێوان خۆی و (رێدار)ی برای مەسەلەكە وا نەكەوێتەوە كە نیازە گومانلێكراوەكانی بۆ هەردوولا ئاشكرا ببێت، تەواو لە هەوڵەكانی بێئومێد بوو، زانی هیچ بەهیچ ناكات، ناچار دەستبەرداری هەوڵەكانی بوو، بەڵام دەستبەرداری تەماحەكانی نەبوو، چاوەڕێی كرد بەڵكو دەرفەتێك هەڵبكەوێت و گورزی خۆی بوەشێنێ، لەدڵی خۆیدا وازی لە ئامانجەكانی نەهێنا بەڵكو بە سەبرەوە لە چاوەڕوانیدا مایەوە. زەماوەندی(رێدار)و(شەهلا) ماوەی چەند مانگێك بەسەر یەكتر ناسینی(شەهلا) و(رێدار)دا رەتبووبوو، پەیوەندییەكەیان گەیشتبووە ئاستێك كە بڕیاری كۆتایی بدەن لەسەر چوونە نێو قەفەزی زێڕینی هاوسەرێتییەوە، ئەوە بوو(رێدار) داخوازی كرد و لەسەر ئەوەش پێكهاتن كە خانوویەك لە تەنیشت یا نزیك ماڵی دایكی (شەهلا) بكڕن و تیایدا نیشتەجێ بن، بەڵام لەبەر ئەوەی(رێدار) ئەو پارەیەی نەبوو خانوویەكی وابكڕێت، ئەوەندەی پێیكرا و لەدەستی دابوو بە(شەهلا) بیدات و لەگەڵ ئەو پارەیەی كە (رێدار) هەیبوو، خانووەكە بكڕن، بەڵام (رێدار) مەرجی ئەوەی دانا كە خانووەكە هەر بەناوی(شەهلا) بێت، چونكە بەشی زۆری پارەكە ئەو داویەتی، بەهەرحاڵ خانوویان كڕی و ئەم دووانەش وەك ژن ومێردێكی بەختەوەر چوونە ناوی. مردنی دایكی (شەهلا) نیوەڕۆ بوو كە ژن ومێرد تازە لە دەوامی ئاسایی خۆیاندا هاتبوونەوە ماڵەوە (شەهلا) گوتی: دەچم سەرێكی دایكم دەدەم و هەواڵی دەپرسم و ئێستا دێمەوە، بشزانم هیچی بۆ ئامادە ناكەم، دوای چەند خولەكێك، زەنگی مۆبایلەكەی (رێدار) لێدرا، كە هەڵیگرت سەیری شاشەكەی كرد، دیتی (شەهلا)یە زەنگی بۆ دەكات، بە هیواشی هەڵیگرت و گوتی ئەلو: بەڵام (شەهلا) بە دەنگێكی لەرزۆك و بەگریان و جۆرێك لە پاڕانەوە داوای لە (رێدار) دەكرد بیگاتێ دایكی كەوتۆتە سەر زەوی، ئەویش بەپەلە خۆی گەیاندێ و بەپەلە گەیاندیانە نەخۆشخانە بەڵام لەوێ پزیشكەكان گوتیان كە دەمێكە گیانی لەدەستداوە، پاش ئەو كارەساتە بە ماوەیەك (رێدار و شەهلا) چوونە ئەو خانووەی كە دایكی تێدابوو، خانووەكەی تریشیان بەكرێدا. نیوەڕۆیەكی رۆژی هەینی كارەبای ماڵیان تێكدەچێ (رێدار) بانگی (رێبوار)ی برای دەكات كە هاوكاری بكات لە چاككردنەوەی ئەویش دەچێتە ماڵیان، ئیتر بەكارەبا چاككردنەوە خەریك دەبن و(رێبوار) كارەبایەكە كە لەشوێنێكدا پچڕانی تێدابوو، بەهەڵە دەبەستێتەوە كاتێك دەبڵی سەرەكی كارەبای ماڵەكە پێدەكەنەوە، كارەباكە شۆت دەكات و(رێدار)یش پێوەی دەبێ و دەمودەست دەیكوژێت، (رێبوار) بە بیانووی ئەو رووداوەوە خۆی دەكاتە خاك و خۆڵ بۆ(شەهلا) نیازەكانی پێشتری و پرۆژە و نەخشەكانی پێشتری زیندوو دەكاتەوە، دەست دەكاتەوە بە هەوڵەكانی خۆی، سەرەتا لەدایك وباوكی دەگەیەنێ، كە ئەو براژنی بووە و ئێستاش بێوەژن ماوەتەوە، چاوی بەرایی نادات كە بەو جوان و جاحێڵییەی بمێنێتەوە، با كەسێكی بێگانە چاوی تێنەبڕیت، هەروەها جوانیش نییە بەتەنیا بمێنێتەوە زۆری تر لەو قسەوبیانوانە، بەڵام(شەهلا) رازی نابێت جارێكی تر مێرد بكاتەوە، بەو رەتكردنەوەیەی(شەهلا)، (رێبوار) شێت و شەیدا دەبێت و هێندەی دیكە لەسەر مەرامەكانی خۆی سوور دەبێت، نزیكەی دوو مانگێك بەسەر مردنی (رێدار)دا رەتدەبێ و(رێبوار)یش بەردەوام دەبێ لەسەر هەوڵەكانی خۆی. جارێك بە قسەی خۆش و لووس، جارێك بە فشارو زۆر بۆهێنان، جارێكیش بە ترساندن و تۆقاندن، هەرچۆنێك بێت دوای ئەوەی دایك و باوكی(رێبوار) زۆر هەوڵ و تەقڵڵا دەدەن كە (شەهلا) رازی بكەن شوو بە(رێبوار) بكات، تا ئاخیرییەكەی قەناعەتی پێدێنن... دوای ئەوەی كە بەهەر جۆرێك بێت قەناعەت بە(شەهلا) دێنن كە شووی پێ بكات، لەم سەروبەندەدا دەبێت كە نزیكەی چوار مانگێك یا زیاتر بەسەر مردنی(رێدار)دا رەتدەبێ، پاش ئەوەی(شەهلا) خۆشی بێ ترشی بێ رازی دەبێ مێرد بە(رێبوار) بكات، رۆژێك(رێبوار) كە جارێ مارەی نەكردووە، داوای سەنەدی ئەو خانوانە دەكات كە هەیەتی و بەناویەتی، ئەم خۆئاشكراكردنەی (رێبوار) دەبێتە باشترین بەڵگە لەسەر نیازو مەرامەكانی (رێبوار)بۆ (شەهلا) و دوای ئەوە بەشێوەیەكی رەها مێردكرن بە (رێبوار) رەتدەكاتەوە (رێبوار)یش كە دەزانێ چ هەڵەیەكی كردووە هەوڵدەدات هەڵەكەی خۆی راستبكاتەوە، بەڵام ناتوانێ تۆزقاڵێكیش رای (شەهلا) بگۆڕێ، (رێبوار) ئیتر دەست دەكات بە هەڕەشەی كوشتن، ئەویش كە دوومامی دەبێ ئەوان ئاگادار دەكاتەوە و دەچێتە بنكەی پۆلیس سكاڵای لە دژی تۆمار دەكات... دادگاش بڕیاری دەستگیركردنی دەدات. دوای ئەویە لە بەندینخانەی دەكەن ئینجا لە ناچاریان بەبەڵێندان و بەڵێنامە پڕكردنەوە كە جارێكی تر ببڕای ببڕ توخنی(شەهلا) نەكەوێ، بەشێوەیەكی كاتی (شەهلا) لێی خۆش دەبێ، بەمشێوەیە بە زەبری دادگا(رێبوار) لەكۆڵ (شەهلا) دەبێتەوە و دەستبەرداری دەبێت

1 2 3 4 5 Views: 479 | Added by: kurdsh | Rating: 0.0/0

Total comments: 0