kurdsh.ucoz.com

Main » 2008 » نوفمبر » 6 » بەسەرهاتی ئەو پیاوەی لە هەڵەی ژنەكەی خۆش بوو

---

2.50.33 PM بەسەرهاتی ئەو پیاوەی لە هەڵەی ژنەكەی خۆش بوو

ئا: گەرمیانی ژن و پیاو كاتێ دەچنە نێو كەژاوەی زێڕینی ژیانی هاوسەرگیرییەوە، دەبێ لەو راستییە گەیشتبن كە ژیانی هاوبەش هەر تەنیا بریتی نییە لە تێركردنی غەریزەكان، بەڵكو لە پاڵ ئەوەدا سۆز و خۆشەویستی و وەفاداری رایەڵەی ژیانی خێزانی ئەو دووانە زیاتر پتەو دەكات، بۆیە پێویستە هەریەك لە ژن و مێرد بە ئەركی سەرشانی خۆیان رابن و لە ئاست هاوسەرەكەیاندا خەمسارد و پەراوێزخەر نەبن و هەریەك لەوان نابێت بەو ئاڕاستەیەدا بیر بكەنەوە كە مادام تازە ژیانی هاوسەرگیریان پێكەوەنا ئەوە ناهێنێ وەكو پێشتر گرنگی و بایەخ بەیەك بدەن، ئەمە بیركردنەوەیەكی هەڵە و كەم عەقڵانەیە، چونكە كاتێ هەریەك لە پیاو و ئافرەت كە یەكتر پەراوێز بخەن لەوانەیە گەورەترین كارەساتی لێ بكەوێتەوە بەوەی كە بۆشایی سۆزداری و سێكسی لە نێوانیاندا دروست دەبێ و لەوانەیە ئەمەش سەربكێشێ بۆ خیانەتكردن، هەروەك ئەم رووداوەی بەردەستتان كە چۆن پیاوێك بەهۆی پەراوێزخستنی ژنەكەیەوە وەختبوو ماڵی وێران ببێ و ژیانی لێبشێوێ عەشقێكی راستەقینە "فەرمان" جگە لەخۆی چواربرا و سێ خوشكی هەیە، ئەو بەهۆی هەژاری و دەستكورتی بنەماڵەكەیەوە نەیتوانیوە درێژە بە خوێندنكەی بدات و هەر زوو وازی لە خوێندن هێنا، هەر لە تەمەنێكی زووی منداڵییەوە دەستی داوەتە كار و كاسبی تاك دوارۆژێك بۆخۆی پێكەوە بنێت، ئالێرەوە فەرمان باسی بەسەرهاتی ژیانی خۆی دەكات و دەڵێت: تەمەنم هێشتا 19ساڵ دەبوو خۆشەویستی مریەم چووە دڵمەوە ئەگەرچی من گەنجێكی هەژار و دەستكورت بووم، بەڵام لەبەر رەوشتبەرزی و راستگۆیی خەڵكی منیان خۆش دەویست، بۆیە كاتێ خۆشەویستی مریەم چووە دڵمەوە لەوە نەدەترسام كە باوكی كچەكەی نەدا بەمن، چونكە باوكی مریەم باش منی دەناسی و دەیزانی كە من خراپەم بۆ مێرولەیەكش نییە، بۆیە هەر لە خۆمەوە دڵخۆش و گەشبین بووم بەوەی مریەم هەر بۆخۆمە و كەس ناتوانێ لێم زەوت بكات، رۆژان هاتن و رۆیشتن من و ئەو كچە پەیوەندیمان پێكەوە دانا، بەڵام پەیوەندییەكی راستگۆیانە و و دوور لە خیانەت، ماوەی(5)ساڵ یەكتریمان خۆشدەویست بەبێ ئەوەی جارێك لە جاران، بەشێوەیەكی خراپ دەستم بەردەستی بكەوێت، ئەوە وایكرد مریەم زیاتر متمانەم پێ بكات و خۆشەویستی من لە دڵیدا جێگیر ببێ، هەروەها منیش لە زۆر شتدا مریەمم تاقیدەكردەوە، دوای ئەوەی بۆم دەركەوت كە بە هیچ شێوەیەك ئەو جگە لەمن كەسێكی تری خۆش ناوێت و خیانەتم لێ ناكات، رۆژان هاتن و رۆیشتن، پەیوەندی نێوان من و مریەم رۆژ دوای رۆژ بەرەو پتەوبوون دەچوو، تا ئەو رۆژەی كە دایك و باوكم رازی كرد كە بچنە داخوازی مریەم بۆم، ئەوەبوو لە تەمەنی 24ساڵیدا من و مریەم بووین بە هاوسەری یەكتر و بەحەز و ئاواتەكانی خۆمان گەیشتین، و لە ژێر ساباتی خێزانێكی بەختەوەردا دەستمان بە ژیانی خۆمان كرد. دڵپیسی هاوسەرەكەم هەموو دووساڵ تێپەڕی نەكردبوو، بەسەر زەواجكردنماندا هەستم دەكرد مریەم لە زۆر حاڵەتدا دڵپیسیم بەرامبەر دەنوێنی و هەمیشە چاودێریم دەكات لە چوونە دەرەوە و هاتنەوەمدا بۆماڵ، هەموو ئەو دڵپیسیەش لەمن هۆكارەكەی بۆ ئەوە دەگەڕایەوە كە من شەریكێكم هەبوو لە دوكانەكەمدا ناوی مارف بوو، ژنێكی زۆر جوانی هەبوو زۆر كەڕەت مارف داوەتی دەكردم و دەچووم لە ماڵەكەیدا نانم دەخوارد جا كە دەگەڕامەوە ماڵ مریەمی ژنم كە دەچوو خواردنی بۆ دەهێنام منیش دەمگووت نانم خواردووە دەیگووت لە كوێ نانت خواردووە؟ كە دەمگووت چوومەتە ماڵی مارف و چێشتی بەلەزەتم خواردووە، ئەو ژنەی من زۆری لەدڵ ناخۆش بوو، دەیگووت دیارە بەخواردنی دەستی من رازی نابیت و حەزت لە چێشتی دەستی ژنی مارفە، رۆژان هاتن و رۆیشتن شەوێكیان مارفی رەفیقم و ژنەكەی هاتنە ماڵمان ئەوەش یەكەمین جار بوو مارف ژنەكەی لەگەڵ خۆیدا بێنێ، جا كە مریەم چاوی بە ژنەكەی مارف كەوت رەنگی زەرد هەڵگەڕا، دەتگووت تووشی لەرزوتابووە، هەموو گیانی دەلەرزی جا دوای ئەوەی میوانەكان رۆیشتن، من هەر بۆ سوعبەت بە مریەمم گووت توخودا دیتت ژنەكەی مارف چەندە جوان و نازدار بوو، بەڕاستی لە مارف خەسارە، هەر كەوامگووت مریەم دەستی بەپرتەوبۆڵەكرد، عەیب ناكەی بەژنی خەڵكی دەڵێی جوان؟ ئەی ژنی خۆت بۆ جوان نییە!! دیارە ئەو هەموو جار كە دەچوویە ماڵیان تەماعت لەو ژنەدا بووە، هەرگیز لێت قەبووڵ ناكەم، منیش گووتم نا ژنەكە تۆ بەهەڵەدا چووی ئەو وەك خوشكی من وایە و هەرگیز بەچاوی خراپ سەیری ناكەم بەس تەنیا ئەوە سوعبەتێك بوو كردم، چونكە زانیم تۆ خۆتیش جوانی ئەو ژنە سەرسامیت، ئیتر ئەوە بوو لەدوای ئەو شەوەوە گەر بچووبامە ماڵی مارفیش نەمدەوێرا لای مریەم بڵێم چوومە، چونكە كێشەی لەگەڵدا دروست دەكردم. ژنەكەم چۆن تاقیكردەوە دوای ئەوەی وەزعی داراییمان بەرەوخراپی رۆیشت وازم لە دوكانەكەم هێنا و دەستم دایە كارێكی تر، ئەوە بوو رۆژانە لە سبەینێوە لە ماڵ دەردەچووم تا رۆژئاوابوون نەدەگەڕامەوە ئیتر دوای نانخواردنی ئێوارە زۆر هیلاك و ماندوو بوونم پێوە دیار بوو بۆیە شەوانیش زوو دەنووستم، ئەمەش وایكردبوو بە تەواوەتی مریەمی ژنم فەرامۆش بكەم، و نەتوانم حەقی هاوسەرێتی خۆمی پێبدەم، لەگەڵ ئەوەی ئەو هیچ قسەی نەدەكر بەڵام بە تەواوی بەسیمایەوە دیاربوو كە لە ناخەوە گلەیی لێم هەبوو، رۆژێكیان فیكرەیەك بەخەیاڵمدا هات و گوتم با منیش ئەمجارە مریەمی ژنم تاقی بكەمەوە تاكو بزانم تاچەند منی خۆش دەوێ و خیانەتم لێناكات و وەفادارە بۆم، ئەوە بوو رۆژێكیان لەبازاڕەوە بە تەلەفۆنی كرێ پەیوەندیم بە ژمارەی مۆبایلی مریەمەوە كرد ئەویش هەڵیگرت ژمارەكە لای نەناسراوبوو، منیش بە تەواوی دەنگی خۆم گۆڕی و بەناوی پیاوێكی ترەوە قسەم لەگەڵیدا كرد، مریەمی هاوسەرم گووتی تۆ كێی من ناتناسم، منیش گووتم من گەنجێكی تەمەن 25ساڵم و ناوم سۆرانە، زۆر لەمێژە عاشقی تۆم بەرلەوەی مێرد بە فەرمان بكەیت من لە ناخەوە خۆشم دەویستی ئێستاكەش كە مێردت كردووە من هەرچاووم لە دواتە، بەڕاستی مریەم تۆیەكی ناسك و نازدار زۆر حەیفە كە مێردت بەو پیاوە كردووە بۆچی تۆخۆت خەساركرد؟ ئەو جوانییەی تۆ ئەو نازداریەی تۆ تەنیا شایەنی گەنجێكی وەك منە، مریەم گیان تۆ نازانی من چەندە عاشقی تۆم، داوات لێ دەكەم واز لە پیاوەكەت بهێنی و مێرد بە من بكەیت، بەڵێن بێت خانوو سەیارەكەشم بەناوت بكەم، و هەر چیشت لە زێڕ و پارە دەوێ من ئامادەم، فەرمان دەڵێت.. كاتێ بە دەنگی گۆڕاوی خۆمەوە، ئەو قسانەم بۆ مەریەم كرد، هەستم كرد تەواو هاتە ژێر بارمەوە، و گوتی: سۆران گیان سوپاس بۆ ئەو هەموو خۆشەویستییەت... بەڵام من ناتوانم كاری وا بكەم، فەرمانی مێردم وازم لێناهێنی.. فەرمان دەڵێت منیش پێمگوت، هەوڵبدە لەگەڵیدا كێشە وگرفت دروست بكە و ژیانی لێ تاڵ بكە، ئیتر ئەو بۆ خۆی تەڵاقت دەدا، مریەم گوتی زۆر باشە بەڕاستی منیش لە دەستی فەرمانی مێردم بێزار بوومە ئەو هیچ بایەخێك بەمن نادات و هەر خەریكی كاركردنە.. فەرمان دەڵێت، منیش كە بە ناوی سۆران قسەم دەكرد گوتم زۆر باشە جا من حەز دەكەم بەیانی دانی سبەینەكەی لە فڵان شوێنی ناو بازاڕ بتبینم بۆ ئەوەی زیاتر من بناسی و قسەی زیاتر پێكەوە بكەین، مریەمیش گوتی زۆر باشە.. ئا لێرەوە فەرمان دەڵێت: ئەو رۆژە ئێوارەكەی هاتمەوە ماڵ، باسی هیچ شتێكم نەكرد، چاوەڕێی بووم، بەیانی بێت بزانم تا چەند مریەمی ژنم، بە دوای ئەو پەیوەندییە تەلەفۆنییە دەكەوێت و خیانەتم لێ دەكات. ئەوەبوو بۆ سبەینەكەی هەر خۆم چوومە ناو بازاڕ لە هەمان كاتی دیاریكراودا و لە شوێنێك سەیری ئەو جێگایەم دەكرد كە بڕیاربوو مریەمی ژنم گوایە سۆران لەوێدا ببینێ، ئەوەبوو زۆری نەبرد لە ناكاوێكدا مریەم بە دڵێكی پڕ خیانەتەوە، شیكترین و جوانترین جلكی لەبەركردبوو بە شێوەیەك خۆی رازاندبووەوە كە قەت لە پێشدا ئەوهاو نەمدیتبوو، ئەو هاتبوو بۆ دیتنی سۆرانێكی خەیاڵی كە هەر من خۆمبووم، ئەوەبوو دوای ئەوەی بیست خولەك چاوەڕێی كرد كە گوایە سۆران بێت بۆ لای كە چی بێ سوود بوو كەسی بە دی نەكرد بۆیە بە ناچاری گەڕایەوە ماڵەوە، ئیتر لەو ساتەوە بۆم دەركەوت كە مریەم خۆشەویتسی منی لە دڵدا نەماوە و دەیەوێت خیانەتم لێ بكات، بۆیە بیرم لەوە كردەوە كە لەوانەیە هەر خۆم هۆكاری ئەوە بم كە ئەم ژنە خیانەت بكات بەهۆی ئەوەی كە من بایەخم پێنەدەدا و هەر سەرقاڵی كاركردن بوومە، بۆیە بڕیارمدا لە جیاتی سزادانی، مامەڵەی خۆمی لەگەڵدا بگۆڕم، ئەوەبوو هەوڵمدا سۆز و خۆشەویستی پێ بدەم و بایەخێكی ئیجگار زۆرم پێدا لە ماوەی هەفتەیەكدا چوار دیاری جوانم بۆی كرد... ئیتر هەستم كرد بە تەواوەتی مەریەم خۆشمی دەوێت هەر كە لە ماڵ دەچوومە دەرەوە چەندین جار تەلەفۆنی بۆ دەكردم و هەواڵی دەپرسیم ئیتر مریەم وای لهات لە رۆحی خۆی زیاتر من خۆشدەویست، چونكە بە تەواوەتی بایەخم پێدەدا، بەڵام من هەر متمانەم پێ نەدەكرد و لێی دڵنیا نەبووم، تا ئەوەی رۆژێكی تر بە هەمان تەلەفۆنی كرێی بازاڕ دیسانەوە دەنگی خۆم گۆڕی و پەیوەندیم بە مریەمەوە كرد و گوتم من سۆرانم، خۆشتم دەوێت چیت دەوێت بۆت دەكەم بەس لەگەڵمدا بە، هەر كەوام گوت مریەم قیژاندی و گوتی بڕۆ هەی بێ رەوشت من پیاوی خۆم بە هەموو دونیا ناگۆڕمەوە، جارێكی تریش تەلەفۆن بۆ ئەم ژمارەیە نەكەیتەوە ، ئا لەو ساتە تەلەفۆنەكەی بەسەردا داخستمەوە، ئەوجا دڵنیابووم كە ژنەكەم نیازی خیانەتكردنی لە دڵدا نەماوە، نایەوێ من لە دەستبدات، ئەوەبوو هەر بۆ شەوەكەی حاڵ و هەقیقەتم بۆی باسكرد كە هەردوو تەلەفۆنەكە هەر خۆم بوومە و تاقیمكردۆتەوە، مریەم زۆر شەرمەزاربوو دەستی بە گریان كرد و گوتی پیاوەكە لێم ببورە، منیش دڵم بۆی سووتا و پێم گووت هەمووی گوناهی من بوو كە تۆم پشتگوێ خستبوو، من هەڵەبووم، لە دەرئەنجامی ئەو رووداوەدا دەگەینە ئەو راستییەی كە كاتێ پیاو بۆشایی سۆز و خۆشەویستی بۆ ژنەكەی بەجێیبهڵێ لەوانەیە ئەو ژنە دووچاری لادان ببێت بەڵام بایەخدانی پیاو بە ژنەكەی و پراكتیزەكردنی داواكاریییەكانی ئاست و رادەی خۆشەویستی ژن بۆ مێردەكەی زیاتر دەكات، بەڕادەیەك ئەو ژنە هۆگری مێردەكەی دەبێت كە ناتوانێ خیانەتی لێبكات و جگە لە ئەویش هیچ پیاوێكی تر نابینێ

1 2 3 4 5 Views: 1899 | Added by: kurdsh | Rating: 0.0/0

Total comments: 0